2020 jyly tólem balansynyń aǵymdaǵy shoty 5,9 mlrd AQSh dollary tapshylyǵymen qalyptasty. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat.
«Aldyn ala derek boiynsha tólem balansynyń aǵymdaǵy shoty bizdiń boljamymyzǵa sáikes kelip, 2020 jyly - 5,9 mlrd AQSh dollary tapshylyǵymen qalyptasty. Bul sheteldik investorlarǵa tólenetin kiristiń qysqarýyna bailanysty 2019 jylǵy tapshylyqtan 1,3 mlrd AQSh dollaryna az», - dedi Ulttyq bank tóraǵasy.
Onyń aitýynsha, aǵymdaǵy shot tapshylyǵynyń negizgi sebebi munai jáne gaz kondensaty eksportynyń qysqarýy esebinen taýarlar eksportynyń tómendeýi bolyp otyr.
«Taýarlar importynyń tómendeýi birqalypty jáne investitsiialyq jáne aralyq taýarlardy ákelýdiń qysqarýyna bailanysty boldy»,- dedi Erbolat Dosaev.
