Tótenshe jaǵdai jariialanǵan Tólebi aýylyndaǵy Qasqasý eldi mekeninde ornalasqan 2 kópirdi tolyq sý shaiyp ketken, bir kópirge zaqym kelgen. Jergilikti mańyzy bar taǵy bir kópirdi sý shaiǵan. 4 kópirdi tolyq retke keltirý jumystary tynymsyz júrip jatyr, - dep habarlaidy oblys ákiminiń baspasóz qyzmeti.
Nátijesinde eki ótkel tolyq retke keltirilip, aýyldar arasyndaǵy bailanys ashyldy. Jolaýshylar kóligi jáne avtomobil joldary basqarmasynyń basshysy Rolan Ibragimovtiń málimdeýinshe, qaita qalpyna keltirý jumystary qysqa merzimde júzege asady.
«Ortasha jóndeý jumystary tynymsyz júrgizilip jatyr. Qasqasý eldimekenindegi shaiylǵan qubyrlardy qalpyna keltirý maqsatynda tiisti tehnika jumyldyrylyp, materialdar jetkizildi. 4 kópirdiń ekeýi bir kúnde qalpyna keltirildi. Taǵy biri rettelip, jaiaý júrginshiler úshin ashyldy. Erteńge deiin aiaqtap, kólik júrý úshin ashamyz. Sońǵysyna qatysty jumystar qarjy máselesiniń sheshilýin talap etedi. Sondai-aq bul jumysqa 20 tehnika jáne 21 jumysshy jumyldyryldy», – dedi oblystyq jolaýshylar kóligi jáne avtomobil joldary basqarmasynyń basshysy Rolan Ibragimov.
Sonymen qatar Tólebi aýdanynyń Qasqasý, Keńesaryq, Qosaǵash, Ekpindi, Birkólik, Kielitas, Dostyq aýyldary men Leńgir qalasynyń aýmaǵynda ornalasqan eldi mekenderinde jańbyr sýy jinalǵan.
Jolaýshylar kóligi jáne avtomobil joldary basqarmasynyń málimetinshe, atalǵan eldi mekenderden ótetin aýdandyq mańyzy bar joldar men aýyl kóshelerinen bólek, birqatar oblystyq mańyzy bar joldarǵa da zaqym kelgen.
Eske sala keteiik, Túrkistan oblysynyń Tólebi, Qazyǵurt, Báidibek aýdandarynda nóser jaýynnan keiin sel júrip, úi aýlalary men kópirlerdi sý alyp ketken edi.
