Táýelsizdik kúni merekesi men Tólebi aýdanynyń qurylǵanyna 90 jyl tolýyna orai aýdan ortalyǵy Lengir qalasynda 3 kópqabatty turǵyn úi paidalanýǵa berildi.
«Nurly jer» baǵdarlamasy aiasynda salynǵan úiden páter kezeginde turǵan 60 otbasyǵa baspana kiltteri tabystaldy. Baspanalar áleýmettik osal toptar sanatyndaǵy otbasylar men ata - anasynyń qamqorlyǵynsyz qalǵan balalarǵa berildi. Naýryz aiynda Tólebi aýdanynda baspana kezeginde turǵan 120 otbasy úili boldy.
Jańa qonys ielerin quttyqtaýǵa arnaiy kelgen Túrkistan oblysynyń ákimi Darhan Satybaldy tólebilikterdiń qýanyshymen bólisti.
«Táýelsizdik alǵan 31 jyl ishinde memleketimizde aýqymdy jumystar atqaryldy. Azattyqtyń arqasynda aýyldardy damytýǵa múmkindik týdy. Osy ýaqyt ishinde bir ǵana Tólebi aýdanynda memleket esebinen 30-ǵa jýyq kópqabatty turǵyn úidiń qurylysy júrgizilip, 1 500 otbasy qonys toiyn toilady. Búgin biz 60 otbasyǵa páter kiltin tabys etpekshimiz. Osynyń bári – halyqtyń ál-aýqatyn arttyrýǵa baǵyttalǵan saliqaly saiasattyń jemisi. Memleket basshysy Qasym-Jomart Kemeluly Toqaev turǵyndardy baspanamen qamtýdy basty nazarda ustaidy. Bul baǵyttaǵy jumystar jalǵasa beredi», – dedi Darhan Satybaldy.
Tólebi aýdanynyń qurylǵanyna 90 jyl tolýyna orai aýdan ortalyǵynda Tóle bi babanyń eńseli eskertshisi ashyldy. «Tólebi baba» saiabaǵynda ornalasqan biiktigi 23 metr bolatyn mys eskertkish demeýshi Áset Qaiypbekovtyń esebinen jasaldy. Músin salmaǵy — 25 tonna. Túrkistan oblysynyń ákimi Darhan Satybaldy Tólebi aýdanynyń 90 jyldyq mereitoiyna orai arnaiy uiymdastyrylǵan «Tuǵyry biik Tólebi» atty merekelik jiynǵa qatysyp, izgi tilegin jetkizdi.
Mereitoida «ETNO – AYYL» alańyndaǵy ulttyq sport oiyndarynan saiys ótti. Kiiz úiler tigilip, halyq ánderi shyrqaldy. El aǵalary eldi birlikke shaqyratyn oilaryn aityp, keńes qurdy. Jergilikti kásipkerlerdiń taýar kórmesi uiymdastyryldy.
«El Prezidenti Qasym-Jomart Toqaev aýyldardy damytý jóninde tapsyrma berdi. Oblys turǵyndarynyń 80 paiyzy aýylda turatynyn eskere otyryp, bul tapsyrma Túrkistan óńirin damytýǵa yqpal etedi dep senemin. Bul rette Tólebi aýdanyn damytý erekshe nazarda tur. Tólebidiń ásem tabiǵaty aqyndardyń óleńine, sýretshilerdiń shabytyna arqaý boldy. Tólebiden óte talantty azamattar shyqty. Qoǵam qairatkerleri, óner jáne mádeniet, sport juldyzdary da osy ólkeden túlep ushty. Ásirese, álemge tanymal sýretshiler óte kóp. Bul – qasietti ólkeniń ereksheligi. Tólebilikter búginde birliktiń qainar kózi bolyp otyr. Eldi basqarǵan Tólebidei dana babamyzdyń esimimen atalǵan aýdannyń bolashaǵy jarqyn. Aýdanda týrizmdi, aýyl sharýashylyǵyn jáne kásipkerlikti damytýǵa tolyq múmkindikter bar. Biz osy baǵytta jumysty kúsheitemiz», – dedi oblys ákimi.
Merekelik jiynda Tóle bi aýdanynyń tarihy dáriptelip tarihi tulǵa týraly derekter aityldy. Aqsý, Sairamsý, Badam ózenderi aǵyp ótetin Tólebi – tarihi muralarymyzǵa óte bai ólke. Túrkistan oblysyndaǵy eń biik núkte – Sairam shyńy osy aýdanda ornalasqan. Ólkede 100-den astam arheologiialyq, arhitektýralyq jáne tarihi eskertkishterdiń orny belgilengen. Aýdannan tabylǵan mádeni oshaqtar ashyq aspan astyndaǵy murajaiǵa ainalyp otyr.
Tóle bi kezinde Qazaq handyǵyn nyǵaityp, eldi biriktirýge airyqsha úles qosty. Ol áigili «Jeti jarǵy» zańdar jinaǵyn shyǵarýǵa atsalysqan. Eldi basqaryp, halyqqa qorǵan bolǵan.
