Búgin Astana qalasyndaǵy mamandandyrylǵan aýdanaralyq qylmystyq ister jónindegi áskeri sot Toqtar Tóleshov pen onyń sybailastaryna qatysty úkim shyǵardy, dep habarlaidy "Ult-aqparat" QazAqparat-qa silteme jasap.
Memlekettik tóńkeris jasamaq boldy dep aiyptalǵan Toqtar Tóleshov 21 jylǵa bas bostandyǵynan aiyryldy. Ol jazasyn qatań rejimdegi túzeý koloniiasynda óteidi.
T. Tóleshov 18 aýyr jáne asa aýyr qylmystar, sonyń ishinde adam óltirý, aiýandyqpen azaptaý, adam urlaý jáne t.b. qylmystar jasaǵany úshin sottaldy. Oǵan taǵylǵan aiyptardyń arasynda memleketti kúshpen basyp alýǵa talpyndy jáne Qazaqstannyń óńir-óńirinde jer daýyn ýshyqtyryp, zańsyz mitingterdi qarjylandyrdy degen aiyptaýlar bar.
Eske sala keteiik, is materialdarynda memlekettik qupiialarǵa qatysty derekter bolǵandyqtan, Toqtar Tóleshovtiń soty birneshe ai boiy jabyq túrde ótken bolatyn.
2016 jyldyń qańtarynda Shymkentte kúsh qurylymdary arnaiy operatsiia júrgizip, ony qolǵa túsirgen bolatyn. Arada alty ai ótken soń, iaǵni, maýsym aiynda Ulttyq qaýipsizdik komiteti resmi málimdeme jasai otyryp, Toqtar Tóleshovke qarajaty men laýazymyn paidalana otyryp, bilikti kúshpen basyp alýǵa árekettendi degen aiyp taqty.
Bul oiyn júzege asyrý úshin Toqtar Tóleshov quzyrly organdar men áskeri saladaǵy vedomstvolardan sybailastar tapqan. Qylmystyq istegi basty jaýapker - Toqtar Tóleshev birqatar qylmystar boiynsha aiyptalǵan bolatyn, olardyń arasynda: adam urlaý, óltirý, zańsyz bostandyǵynan aiyrý, bilikti basyp alýǵa jariia shaqyrý, sondai-aq bilikti basyp alý nemese QR Konstitýtsiialyq qurylysyn kúshtep ózgertý, ekstremistik top qurý, oǵan basshylyq etý nemese onyń qyzmetine qatysý, tonaýshylyq, uiymdasqan qylmystyq top, uiym qurý jáne oǵan basshylyq etý siiaqty aiyptar taǵylǵan.
Sondai-aq ol qarýlardyń, oq-dárilerdiń, jarylǵysh zattardyń jáne jarylǵysh qurylǵylardyń zańsyz ainalymyna aiyptalýda. Sonymen birge, Tóleshovtiń ótkizý maqsatynsyz esirtki zattarynyń zańsyz ainalymyna qatysy bar ekendigi jóninde aiyp taǵylǵan bolatyn.
Keiinirek əleýmettik jelide T. Tóleshovtiń qylmys jasaǵanyna shyn kóńilimen ókingeni jóninde qujattar jariialandy. UQK-niń basshysyna jazǵan ótinish-hatynda «Shymkentsyra» JShS-niń eks-direktory T. Tóleshov Qazaqstanda jerdi sheteldikterge satý men jalǵa berýge qarsy sherýlerdi uiymdastyrǵanyn moiyndady.
«Halyq meni qoldaý úshin biliktiń bedelin túsirý kerektigin bildim. Ol úshin áleýmettik jarylys jasaý kerek edi. Mundai is óz qolymnan kelmeitinin túsindim. Sol úshin Atyraýdaǵy erik-jigeri mol Talǵat Aiandy izdep-taptym. Ol óziniń sońynan halyqty erte alatynyna sendim. Sondyqtan aqshalai demeýshilik jasap, «halyq batyrynyń» beinesin somdaýdy tapsyrdym. Men BAQ-tarda uzaq ýaqyt talqyǵa túsken jer reformasynyń bolatynyn bildim. Qazaqtardyń týǵan jerin qorǵaý úshin eshteńeden taiynbaitynyn eskerip, osy múmkindikti paidalanǵym keldi. Sol úshin qyzba minezdi turǵyndary kóp Atyraýdy tańdadym. Jáne ol jerdegi búlikke qatysymnyń baryn eshkim sezbeidi dep túidim. Sóitip, óz qyzmetkerlerime Talǵat Aianǵa 100 000 dollar jiberip, «jer máselesimen» ainalysýǵa jáne qazaq jerin sheteldikterge satý týraly ósek taratýǵa nusqaý berdim. Mundai áreket jurtty dúrliktirip, halyq týǵan jerdi qorǵaý úshin kóteriletinin bildim»,- delingen qujatta.
Ol óziniń túpki maqsaty - halyqtyń bilikke degen ashý-yzasyn týǵyzý jolymen elde vitse-prezident laýazymyn engizýge qol jetkizýdi kózdegen.
