Sýdia Tóleshevten tárkilengen múlikterdiń tizimin jariia etti. Memleket paidasyna ondaǵan avtokólik, jylqylar, úiler men jer telimderi alynatyn boldy, - dep habarlaidy "Ult aqparat" Tengrinews.kz portalyna silteme jasap. Búgin Astana qalasynyń Mamandandyrylǵan aýdanaralyq áskeri soty Toqtar Tóleshevke qatysty sot úkimin shyǵarǵan bolatyn.
"30 bas jylqy, onyń ishinde 11 bas asyl tuqymdy, eki urǵashy jáne bir atan túie. Túrkistandaǵy jer telimi, "Mitsýbishi", "Taiota Land Krýzer", "Bentli", "Shevrole", "BMV", "Mersedes, "Shevrolet", "Porshe kaen", "Taiota Kamri", "Folsvagen", "Taiota Prado", "Infiniti", Taiota Prado", "Taiota Kamri", "Roils roils" markaly kólikter, avtoturaq pen qarjy-qarajatty", - dep úkim shyǵardy sýdia.
Tizimde tárkilenýge jatatyn 40 shaqty kólik kórsetilgen.
"Jyljymaly múlik pen zergerlik buiymdar. 22 zergerlik buiym jasaý qurylǵylary. Toqtar Tóleshevtiń, Jumabaeva Orazgúldiń, Esenbaeva Nadiianyń, Saýqanbekova Sáýleniń, Nýralina Dinanyń esep kartochkalaryndaǵy qarjy, 183 dana erler men áielderdiń altyn áshekeileri. Tintý barysynda anyqtalǵan 50 myń dollar, (Dosambaevtan tárkilengen) 18 myń dollar, 855 eýro, 1370 resei rýbli, 15 túrkiialyq lir, 91 myń ózbek somy, 5 281 teńge, 29 dana anyqtalmaǵan sheteldik valiýta memleket paidasyna alynsyn", - dep oqydy úkimdi sýdia.
Sot sheshimi boiynsha Shymkentte ornalasqan 9 úi men osynsha jer telimi tárkilenedi.
