Qazaq eliniń tuńǵysh ǵaryshkeri, Halyq qaharmany Toqtar Áýbákirov «Qyzylorda oblysynyń qurmetti azamaty» atandy, dep habarlaidy QazAqparat agenttigi.
Búgin Syr óńirinde el Táýelsizdiginiń 30 jyldyǵy mereitoiy aiasynda egemen eldiń damýyna ólsheýsiz úles qosqan birqatar azamattar memlekettik nagradalarmen marapatqa ie boldy.
N.Bekejanov atyndaǵy qazaq akademiialyq drama teatrynda ótken saltanatty jiynda Senat Tóraǵasy Máýlen Áshimbaev Syr eli halqyn Táýelsizdiktiń mereitoiymen quttyqtap, memlekettik nagradalardy tabys etti.
Mereitoilyq saltanatta syrboiylyq azamattar «Parasat», «Qurmet» jáne III dárejeli «Eńbek dańqy» ordeni, «Eren eńbegi úshin», «Shapaǵat» medalin, Qurmet gramotasyn ielendi.
Sondai-aq, oblys ákimi Gúlshara Ábdiqalyqova Qazaq eliniń tuńǵysh ǵaryshkeri, Halyq qaharmany Toqtar Áýbákirovke, burynǵy sý sharýashylyǵy ministri Nariman Qypshaqbaevqa, QR Parlamenti Senatynyń depýtaty Murat Baqtiiarulyna «Qyzylorda oblysynyń qurmetti azamaty» ataǵyn tabys etti.
Toqtar Áýbákirov 1946 jyly Qaraǵandy oblysynda dúniege kelgen. 1991 jyly 2 qazanda Baiqońyrdan «Soiýz TM-13» kemesimen ǵaryshqa ushty. Ǵaryshta biotehnologiia, metallýrgiia, meditsina salalary jáne Aral aimaǵy boiynsha ǵylymi-zertteý jumystaryn júrgizdi. QR Qorǵanys ministriniń 1 orynbasary, QR Ulttyq aeroǵaryshtyq agenttiginiń bas direktory - Ǵylym jáne jańa tehnologiia ministriniń orynbasary, QR Joǵarǵy Keńesiniń depýtaty – Qorǵanys jáne qaýipsizdik komitetiniń tóraǵasy, QR Prezidentiniń keńesshisi laýazymdaryn abyroimen atqardy. Qazaq KSR Joǵarǵy Keńesiniń 12 shaqyrylym depýtaty, QR Joǵarǵy Keńesiniń 13 shaqyrym depýtaty, Qyzylorda oblysynan QR Parlamenti Májilisiniń 3-shi shaqyrylym depýtaty bolyp sailanǵan.
Nariman Qypshaqbaev 1934 jyly Qostanai oblysynda dúniege kelgen. 1974 jyldan táýelsizdik alǵanǵa deiin Qazaq KSR Melioratsiia jáne sý sharýashylyǵy ministrligin basqardy. 1990 jyly Sý resýrstary memlekettik komitetiniń tóraǵasy bolyp taǵaiyndalǵan. Táýelsizdik jyldary Sý kodeksi jobasynyń ázirlenýine jetekshilik jasap, Ortalyq Aziia, Resei Federatsiiasy jáne Qytai memleketteri arasynda transshekaralyq ózenderdegi sý resýrstaryn paidalaný jóninde halyqaralyq uiymnyń qurylýyna, sonyń ishinde Qazaqstan, Qyrǵyzstan, Tájikstan, Túrkimenstan, Ózbekstan memleketteriniń prezidentterimen qurylǵan Halyqaralyq Araldy qutqarý qorynyń qurylýyna úlesi zor. Qazirgi tańda Aral, Syrdariiadaǵy sý deńgeii máselelerine qatysty usynystaryn jetkizip, eldik múddesine qyzmet etýde.
Murat Baqtiiaruly 1958 jyly Qyzylorda oblysynda dúniege kelgen. 1986-1998 jyldary Qyzylorda pedagogikalyq institýty tarih kafedrasynyń aǵa oqytýshysy, kafedra meńgerýshisi, tarih jáne quqyq fakýltetiniń dekany qyzmetterin atqaryp, bilim salasynyń damýyna zor úles qosty. Tarih ǵylymdarynyń kandidaty, saiasi ǵylym doktory, professor. Qyzylorda oblysynyń oblystyq maslihat depýtaty, Qyzylorda oblysy ákiminiń orynbasary laýazymyn abyroimen atqardy. Qazirgi tańda QR Parlamenti Senatynyń Áleýmettik-mádeni damý jáne ǵylym jónindegi komitetiniń tóraǵasy.
