Dúisenbi kúni tańerteń Tokioǵa surapyl taifýn keldi. 30-dan astam adam jaraqat aldy. El astanasynyń iri temir jol operatorlary jumystaryn toqtatýǵa májbúr boldy, dep habarlaidy QazAqparat KYODO-ǵa silteme jasap.
Shamamen tańǵy 5-te Faksai taifýny Tiba qalasynyń aýmaǵyna kelip jetkendikten, East Japan Railway Co. kompaniiasy Úlken Tokio aýdanyndaǵy qozǵalysyn toqtatty. Temir joldar tekseristen ótkennen keiin JR East kompaniiasy saǵat 10-ǵa qarai jumysyn qaita bastaityn bolady.
Jergilikti bilik ókilderiniń habarlamasyna sáikes, Tiba prefektýrasynyń Tateiama qalasynda jáne jaqyn mańdaǵy óńirlerde onnan astam, al Tibada 10 adam jaraqat alǵan. Kanagava prefektýrasynda taǵy da 5 adam jaralanǵan.
Bul maýsymdaǵy 15-shi taifýn Ibaraki prefektýrasynyń Mito qalasynan sekýndyna 30 shaqyrym jyldamdyqpen tańǵy 8-ge qarai ońtústik-batysqa jyljydy.
Japoniialyq meteorologiialyq agenttiktiń málimetinshe, taifýnnyń ortasyndaǵy atmosferalyq qysym 960gPa (gektopaskal) qurady, al jeldiń jyldamdyǵy saǵatyna 216 shaqyrym boldy. Meteoqyzmet qatty jaýyn-shashynnan keiin sel kóshkininiń nemese sý tasqynynyń bolýy múmkin ekenin eskertti.
Tokyo Electric Power Company Holdings Inc málimetinshe, Tiba jáne Kanagava prefektýralaryndaǵy 920 turǵyn úi ýaqytsha jaryqsyz qalǵan. Tokaido-Sinkansen baǵytyndaǵy Tokio jáne Odavara stansalarynyń arasyndaǵy joldarda qoqys pen qaldyqtar jinalǵan soń, Central Japan Railway Co kompaniiasy saǵat 7:40-ta jolaýshylar tasymaldaityn júrdek poiyzdardyń qozǵalysyn jańartty.
Tokiianyń Haneda áýejaiynan ushyp, qonatyn kóptegen reister jeksenbi kúni keshkisin toqtatyla bastady.
Dúisenbi tańynan 24 saǵat buryn Sidzýoka prefektýrasyndaǵy Idzý qalasyna 440 millimetrden astam jaýyn-shashyn tústi.
Bul Tiba prefektýrasyna kelgen 9-shy taifýn. Sońǵy taifýn prefektýrada 2016 jylǵy tamyzda soqqan.
