Bokstan Qazaqstan erler quramasynyń bas bapkeri Ǵalymbek Kenjebaev shákirtteriniń Tokio tórinde qalai tamaqtanyp júrgeni týraly málimet berdi, dep habarlaidy QazAqparat.
Tokiodan BAQ ókilderimen Zoom arqyly tikelei bailanysqa shyqqan bas bapker Olimpiada qalashyǵynda sportshylar jasalǵan jaǵdaiǵa kóńilderi tolatynyn aitty.
«Bárimiz mundaǵy jaǵdaiǵa boi úiretip boldyq. Jasalǵan jaǵdai qalypty, taza, sportshylarǵa arnalǵan. Bul jerge biz demalýǵa kelgen joqpyz ǵoi. Sportshylardyń tynyǵýyna qajet jaǵdaidyń bári bar. Keldiń, tynyqtyń, jattyǵý jasap, jýyndyń. Ol úshin bári bar. Taǵamdary da alýan túrli. Túrli ashanalar bar. Ishinen ózińe qajettisin tańdap alýǵa bolady. Ulttyq Olimpiada komiteti de shet qalyp jatqan joq. Ár kezdegidei qosymsha tońazytqyshqa bárin uiymdastyrǵanbyz. Árdaiym ózimizben birge qosymsha tamaq alyp júremiz. Meiiz, jańǵaq, bal, siiaqty aǵzaǵa qajet ónimder bar. Azdap qazy da bar. Bul birinshi jarys emes. Sondyqtan, bizge boi úiretý úirenshikti jait», - dedi Ǵalymbek Kenjebaev.
Bas bapker búkil álem áńgime etip júrgen Olimpiada qalashyǵyndaǵy plastik tósekter týraly da oiyn bildirdi.
«Birinshiden, bul tósekter uiyqtaýǵa óte qolaily. Men alǵashynda onyń karton ekenin baiqaǵan joqpyn. Keiin ǵana kórdim. Al matrasy óte jaily», - dedi boksshylardyń bapkeri.
