Jeńil atletikadan London Olimpiadasynyń chempiony, jazǵy Olimpiadanyń júldeler jiyntyǵynyń tolyq iegeri Olga Rypakova jáne bokstan ulttyq quramanyń kapitany, álem chempionatynyń eki dúrkin júldegeri Qamshybek Qońqabaev Tokioda Qazaqstan Olimpiada quramasynyń Tý ustaýshylary retinde tańdaldy. Bul týraly búgin Ulttyq Olimpiada komitetinen málim etti, dep habarlaidy "Ult aqparat".
Tý ustaýshylardy Qazaqstan Ulttyq Olimpiada komitetiniń Atletter komissiiasy usynǵan.
«Tarihi Tokio Olimpiadasynyń bastalýyna bir aidan az ýaqyt qaldy. Saǵyna kútken Olimpiada oiyndary ótedi jáne de oǵan Qazaqstan maqtanyshpen óziniń eń úzdik sportshylaryn attandyrady. Eń laiyqtylary irikteldi. Men Olga Rypakovanyń Olimpiadanyń ashylý saltanatynda Qazaqstan Týyn alyp shyǵatynyna qýanyshtymyn. Sebebi, Olganyń arqasynda kók bairaǵymyz Olimpiada kóginde bir emes, birneshe ret jelbiredi. Qamshybek Qońqabaev – qazaqstandyq sporttyń kúshi men sheberliginiń úlgisi, Olimpiada sharshy alańynda zor jaýapkershilikke ie bolǵan boks quramasynyń kapitany. Eki sportshy da qatarlastarynyń aldy, quramanyń kóshbasshylary jáne jas býynǵa úlgi. Qos atletke jáne barlyq olimpiadalyq quramǵa sáttilik tileimin», - dedi Qazaqstan UOK basshysy Timýr Qulybaev.
Olga Rypakova úshin Tokiodaǵy jarys onyń sport mansabyndaǵy tórtinshi Olimpiada bolmaq. Ol úsh qarǵyp sekirý boiynsha 2008 jyly Beijiń Olimpiadasynda kúmis, 2012 jyly Londonda altyn jáne 2016 jyly Rioda qola medal jeńip aldy.
Budan bólek, Olganyń enshisinde Ýniversiada «altyny» jáne Aziia oiyndarynyń 6 altyn medali bar. Sondai-aq, ol álem chempiony jáne 2010 jylǵy qurlyqtyq kýbogtiń iegeri.
«Olimpiada oiyndaryndaǵy Qazaqstanǵa tiesili 16 «altynynyń» úsheýin áielder jeńip aldy. Jyldan-jylǵa sporttaǵy áielder sany artyp, olar jańa rekordtar ornatady dep senemin. Olimpiada oiyndarynyń ashylý saltanatynda elimizdiń týy senip tapsyrylǵany keremet áser, sezimge bóleidi. Dál osy missiianyń maǵan usynylǵanyna jáne senip tapsyrylǵanyna qýanyshtymyn», - deidi Olga Rypakova.
Qamshybek Qońqabaev - bokstan Qazaqstan erler ulttyq quramasynyń kapitany. Ol 2014 jyly áskeriler arasynda ótken álem chempionatynyń jeńimpazy. Aziia chempionatynyń eki dúrkin jeńimpazy jáne 2017 men 2019 jylǵy álem chempionattarynyń kúmis júldegeri. Tokio Olimpiadasy 29 jastaǵy qyzylordalyq sportshy úshin alǵashqy Olimpiada oiyndary bolmaq.
«Tokiodaǵy Olimpiada oiyndarynyń ashylý saltanatynda týdy ustap shyǵýdy maǵan senip tapsyrǵany úshin Qazaqstan men elimizdiń sport qoǵamyna alǵys bildirgim keledi. Bul men úshin úlken jaýapkershilik jáne úlken mártebe», - dedi Qamshybek Qońqabaev.
Olimpiada oiyndarynyń ashylý saltanaty 23 maýsymda Tokio Olimpiada stadionynda ótedi. Olimpiadalyq komanda Tokioǵa jiberilgenge deiin jattyǵý bazalarynda kem degende eki apta karantinde bolady. Komanda Japoniiaǵa 16 shildede attanady. Qaýipsizdik pen densaýlyqty qorǵaýdy qamtamasyz etý úshin delegatsiianyń reisteri «Air Astana» áýekompaniiasynyń charterlik reisterimen júzege asyrylady.
Buǵan deiin habarlaǵanymyzdai, qazir Olimpiadaǵa Qazaqstannan 95 sportshy baratyny belgili. Degenmen, sportshylardyń sońǵy ári naqty tizimi 5 shildeden keiin anyq bolady. Sebebi UOK keibir sport túrlerinen halyqaralyq federatsiialardyń litsenziialardy qaita bólý, úlestirý nátijelerin kútýde.
