Sársenbi kúni Tokionyń astanalyq úkimeti 714 jańa koronavirýs juqtyrý oqiǵasy týraly málimdedi. Bul kórsetkish indetke shaldyqqandardyń kúrt óskenin kórsetedi, dep habarlaidy Kiodo agenttigi.
Tokioda infektsiia juqtyrýdyń jeti kúngi ortaq táýliktik kórsetkishi 508,4 bolyp otyr. Bul úkimettiń shkalasy boiynsha tórtinshi – eń nashar deńgei. Aýrýdyń qaita órshýi premer-ministr Iosihide Sýganyń Tokioda Olimpiadaǵa bir aidan az ýaqyt qalǵan kezde taǵy bir tótenshe jaǵdai engizýi múmkin degen qorqynysh týdyrdy.
«Biz ahýaly muqiiat baqylap otyramyz jáne ýaqytynda kerekti sharalardy qoldanamyz», - dedi Sýga sársenbi kúni COVID-19 boiynsha ministrlik otyrysynda.
Densaýlyq saqtaý ministrliginiń saraptamalyq toptarynyń bólek otyrysynda Ulttyq juqpaly aýrýlar institýtynyń baǵalaýynsha, alǵash ret Úndistanda anyqtalǵan koronavirýstyń Delta nusqasy maýsymnyń sońyndaǵy Tokiodaǵy jáne kórshi prefektýralardaǵy juqtyrý oqiǵalarynyń 30 paiyzynyń sebebi bolǵan.
Institýt bul kórsetkishtiń 23 shildede bolatyn Olimpiada oiyndarynyń ashylýynyń aldynda 50 paiyzǵa jetýi múmkin dep eskertti.
Densaýlyq saqtaý, eńbek jáne áleýmettik qamtamasyz etý ministri Norihisa Tamýra astanylyq aýrýhanalardaǵy tósek oryn tapshylyǵyn qalai sheshýge bolatynyn talqylaýǵa shaqyrdy.
Tokioda maýsym aiynda koronavirýstyń 12 979 jańa oqiǵasy tirkeldi.
Aita ketsek, Olimpiada oiyndary 2020 jyldyń 24 shildesi men 9 tamyzy aralyǵynda ótýi tiis edi. Alaida pandemiia saldarynan ýaqyty bir jylǵa shegerilip, osy jyldyń 23 shildesi men 8 tamyzy aralyǵynda ótetin boldy.
