Tokio Olimpiadasynda reseilik sportshy jáne Chili Respýblikasynan kelgen jýrnalistiń arasynda janjal týyndady. Uiymdastyrý komiteti osy máselege qatysty tergeý sharalaryn bastady, dep jazady Sputnik agenttigi.
Sársenbi kúni Daniil Medvedev ekinshi ainalymda italiialyq tennisshi Fabio Foninidi jeńip, Olimpiadanyń 1/8 finalyna shyqqan bolatyn. Osy matchtan keiin baspasóz máslihaty ótti. Reseilik sportshy jýrnalisterdiń suraǵyna jaýap bergen. Kezdesý barysynda Chiliden kelgen bir jýrnalist barlyq reseilik sportshyny "chiter" (ótirikshi) dep atap, Medvedevten ózin olardyń qatarynda qalai sezinetinin surady.
Reseilik tennisshi ómirinde alǵash ret jýrnalistiń suraǵyna jaýap berýden bas tartyp otyrǵanyn aityp, Halyqaralyq tennis federatsiiasynan (ITF) reporterdi jarystarǵa kirgizbeýdi talap etti.
Kreml de Medvedevtiń ustanymyn qoldady. Al jýrnalistiń alaiaqtyq jaiynda aitqan sózin sportshylarǵa til tigizý dep baǵalady. RF prezidentiniń baspasóz hatshysy Dmitrii Peskovtyń aitýynsha, tennisshi arandatýshylyq áreketke laiyqty jaýap bergen.
Al Olimpiadanyń uiymdastyrý komiteti reseilik sportshy men chililik jýrnalist arasyndaǵy janjal boiynsha tergeýdiń bastalǵanyn habarlady.
"Uiymdastyrý komiteti tergeýdi bastady", — dedi Reseidiń Olimpiada komitetiniń ókilderi RIA Novosti agenttigine bergen suhbatynda.
Aita keteiik, Fabio Foninige qarsy matchta Daniil Medvedev ózin nashar sezinip, dárigerler kómegine júginýge májbúr boldy.
