Velosporttan Qazaqstan komandasy 2004 jylǵy Olimpiada oiyndarynan keiin alǵash ret tórtjyldyq dodasyna úsh litsenziia jeńip aldy, dep habarlaidy "Ult aqparat" olympic.kz-ke silteme jasap.
Halyqaralyq velosipedshiler odaǵynyń reitinginde Qazaqstan 3259,35 upai jinap, 19-shy orynǵa turaqtady. Irikteý erejesine sáikes, bul bizdiń komandanyń Tokio oiyndaryna úsh sportshy aparýyna múmkindik beredi.
Bas bapker Asan Bazaevtyń aitýynsha, bul - tarihi jaǵdai. «Sońǵy úsh Olimpiada oiyndarynda biz osynsha litsenziia almaǵanbyz. Sondyqtan biz úshin bul jaqsy nátije dep aýyz toltyryp aita alamyn. Komandanyń kórsetkishi tolyǵymen kóńilden shyǵady. Árine, mundai jetistikke jetý úshin úzdik sportshymyz Aleksei Lýtsenkonyń qosqan úlesi zor. Bir jyl boiy upaiǵa talasqan komandadaǵy ózge shabandozdardyń da eńbegin joqqa shyǵarmaimyn. Jigitterdiń barlyǵy da joǵary deńgeide jumys istedi. Jeńisimiz de kóp boldy. Endigi jospardyń barlyǵy tikelei Olimpiada oiyndarymen bailanysty. Tokioǵa daiyndyq josparyn túzemiz. Onyń ishinde biik taý deńgeiinde ótetin jattyǵý jiyndary bar. Taýdaǵy jiyn Olimpiada qarsańynda ótedi. Komanda quramy týraly ázirge eshteńe aita almaimyn. Jańa maýsym áli bastalǵan joq. Sportshylarymyz azǵantai úzilisten endi oralyp jatyr. Olimpiada oiyndaryna qatysatyn naqty quramdy Tokiodaǵy doda jaqyndaǵan tusta aitamyz. Bizdi tynymsyz daiyndyq kútip tur. Óz áleýetimizdi kórsetetin múmkindik bar. Lýtsenko naǵyz babynda. Sondyqtan, tek alǵa umtylamyz», - dedi A. Bazaev.
Ázirge belgili bolǵany, 2020 jylǵy Tokio Olimpiadasynda úsh qazaqstandyq veloshabandoz toptyq jarysta baq synaidy. Sondai-aq, olardyń biri jekelei jarysqa qatysady.
