Qazaqstan sportshylaryn Tokio-2020 jazǵy Olimpiada oiyndaryna daiyndaýǵa jáne alyp barýǵa qansha qarajat bólindi? Bul suraqqa QR Ulttyq Olimpiada komiteti sport direktsiiasynyń direktory Elsiiar Qanaǵatov jaýap berdi, dep habarlaidy QazAqparat.
«Qarjyǵa qatysty barlyq aqparat saitta kórsetilgen. Ol jerde jalǵan aqparattarda aitylyp júrgen úlken soma joq. Biz Tokio Olimpiadasymen qatar, Aziia oiyndaryna da daiyndaldyq. Ótken jyly pandemiiaǵa bailanysty 10,9 mlrd teńge bólindi. Biyl eki birdei álemdik dodaǵa qatysatyn bolǵandyqtan 15,6 mlrd teńge qarastyryldy. Onyń ishinde sportshylardyń jalaqysy, qajetti qural-jabdyqtar alý, meditsinalyq kómek, jiyndardy ótkizý, litsenziia utyp alý saiystaryna qatysý sekildi birneshe baǵyt bar.
Tokioǵa Qazaqstannan úlken kólemde delegatsiia ketipti degen de sybys tarap jatyr. Kerisinshe, pandemiiaǵa bailanysty uiymdastyrýshylar kelýshilerdiń sanyn shektedi. Iá, bizdiń komitettiń qyzmetkerleri bar, olar Olimpiada kezinde kúni-túni eńbek etip jatyr. Sondyqtan kóp adam keldi degendermen kelispeimin. Bólingen qarajatty sportshylarǵa jetkizýge tyrysamyz», - dedi Elsiiar Qanaǵatov OKQ-de onlain ótken baspasóz máslihatynda.
Sondai-aq, komitet ókili Tokio Olimpiadasy saparyna bólingen qarjydan 300 mln teńge únemdelgenin alǵa tartty.
