Tokio Olimpiadasynda bokstan 1/8 finalynyń jekpe-jekteri bastaldy. Búgin ringke qazaqstandyq boksshy Sáken Bibosynov (52 keli) ta shyqty, dep habarlaidy "Ult aqparat".
Ekinshi ainalymda Bibosynov frantsýz boksshysy Billal Bennamamen kezdesti. Jerlesimiz birinshi raýndtan bastap ringtiń ortasyn bermei, qarsylasyna qysym jasai bastady. Soqqylary da dittegen jerine jetti. Sonyń arqasynda birinshi raýndna basymdyqqa ie boldy. Bes tóreshiniń tórteýi oǵan joǵary upai berdi.
Ekinshi raýndta qazaqstandyq boksshynyń qarqyny sál báseńdese de, óz basymdyǵyn ustap qaldy. Al úshinshi raýnda ekeýi ashyq judyryqtasty. Bastaryn bir-birine tirep qoiyp, seriialyq soqqylaryn jasady. Bibosynov osy raýndty da alyp ketti. Qorytyndy esep- 5:0.
Shirek finalda Bibosynov ispaniialyq boksshy Gabriel Eskobar Maskýnanomen qolǵap túiistiredi. Bul jekpe-jek 3 tamyzda ótedi.
Buǵan deiin Bibosynov alǵashqy jekpe-jekte pýertorikalyq Iankel Rivera Figerony 4:1 esebimen jeńgen bolatyn.
Aita keteiik, Olimpiadada tórt boksshymyz qaldy. Olar - Zakir Safiýllin (63 keli), Sáken Bibosynov (52 keli), Ábilhan Amanqul (75 keli) men Qamshybek Qońqabaev (91 keliden joǵary). Qalǵan tórt boksshy jarys jolyn aiaqtaǵan bolatyn. Atap aitqanda, Serik Temirjanov (57 keli) ekinshi ainalymnan asa almasa, 69 keli salmaq dárejesinde Abylaihan Júsipov amerikalyq boksshyǵa jol berdi. Al Vasilii Levit (91 keli) nokaýtpen utyldy. Álem chempiony Bekzad Nurdáýletov te birinshi jekpe-jekte reseilik boksshydan jeńilip qaldy. Qazaqstannyń áielder komandasy atynan Tokio Olimpiadasyna barǵan jalǵyz boksshy Nadejda Riabets (75 keli) birinshi jekpe-jekte utylyp qaldy.
