Búgin Parlament Májilisiniń jalpy otyrysynda depýtat Erlan Sairov sport salasyndaǵy júieli problemalardy kóterdi. Osy oraida ol Premer-Ministrdiń orynbasary Eraly Toǵjanovtyń atyna depýtattyq saýal joldady, dep habarlaidy QazAqparat.
«Tokiodaǵy Olimpiada oiyndary Qazaqstannyń sport salasyndaǵy júieli problemalardy ashyp berdi. Osyǵan bailanysty, Prezident Qasym-Jomart Toqaev elimizdiń sport salasynyń damýyna óziniń alańdaýshylyǵyn bildirdi. Bizdiń sport salasynda qarama-qaishylyqtar óte kóp! Keibir sport obektilerine aǵyl-tegil qarjy bólingen. Mysaly, Shýchinskidegi taýly shańǵy tramplini nysanyna 38 mlrd teńge jumsalǵan. Al sporttyq nátije joq. 2021 jyly joǵary jetistik sportyna 47 mlrd teńgeden astam bólinse, buqaralyq sporttyń damýyna bar joǵy 2 mlrd teńge bólingen. Balalar men jasóspirimder mektepteri men jattyqtyrýshylarynyń materialdyq-tehnikalyq múshkil jaǵdaiy, el ishinde jasóspirimder arasynda jarystardyń bolmaýy, balalar men jastar sportyn qoldaýdyń júiesiniń joqtyǵy sport jetisteriniń basty tejegishi», - dedi E. Sairov.
Onyń paiymynsha, sport federatsiiasyna basshy bolǵan oligarhtar sportty damytýǵa emes, biýdjet qarjysyn igerýge áýes. Nur-Otan Fraktsiiasy sport salasyn túbegeili reformalaý qajet dep esepteidi. Qazaqstannyń sport salasy elimizdiń ishki adami kapitalyn paidalanýǵa jáne damytýǵa baǵyttalýy tiis.
«Aýyl-aimaqtarda balalardyń jappai sportpen ainalysýyna jaǵdai jasaý kerek, ol úshin mektebi bar barlyq aýyldarda zaman talabyna sai sport zaldaryn salý mańyzdy. Aýyl-aýdan deńgeiinde bala-jasóspirim sport mektepterin qalypqa keltirip, olardyń oqý-jattyǵý ádisterin modernizatsiia jasaý qajet. Óńirlik ákimshilikter oblystyq buqaralyq sport jarystaryn kóptep uiymdastyryp, jas jetkinshekterge jol ashatyn jaǵdai jasaýlary kerek. Qazaqstanda salynǵan iri sport keshenderinde balalar men jasóspirimderge baǵa óte qymbat bolǵandyqtan dene shynyqtyrý, sportpen shuǵyldana almaidy. Qarapaiym halyqqa, ásirese balalarǵa bul keshenderdiń esigi «tars jabylǵan». Osy máseleni shuǵyl sheshý mindet!», - dedi depýtat.
«Jattyqtyrýshylardyń kásibi deńgeiin arttyra otyryp, ártúrli ozyq halyqaralyq mekteptermen tájiribe almasýdy jolǵa qoiý mańyzdy. Shette, basqa elderdiń medal qorjynyn toltyryp júrgen ulttyq jattyqtyrýshylardy elge qaitarý - basty mindet. Barlyq únemdelgen qarjy Olimpiadalyq sport Federatsiialarynyń materialdyq-tehnikalyq bazasyn jetildirýge, jattyqtyrýshylardyń moraldyq, professionaldyq, materialdyq deńgeiin kóterýge, óz elimizdiń jas sportshylaryn tárbieleýge baǵyttalýy tiis», - dedi ol.
