Bokstan Tokio Olimpiadasynda Qazaqstan komandasynyń úzdigi Bekzat Nurdáýletov jeńilip qaldy, dep habarlaidy Olympic.kz.
81 kelige deiingi salmaq dárejesi boiynsha ótken kezdesýde qazaqstandyq boksshyǵa qarsy reseilik Imam Hataev shyqty. Birinshi raýnda Nurdáýletov birneshe aýyr soqqy ótkizip aldy. Degenmen esesin qaitara bildi. Al tóreshilerdiń bári reseilik sportshyǵa joǵary upai berdi. Ekinshi raýndta qazaqstandyq boksshy óz shabýylyn údete tústi. Sonyń arqasynda bes tóreshiniń úsheýi onyń ónerin joǵary baǵalady. Al úshinshi raýndta ekeýi ashyq bokstasty.
Jekpe-jekti eki ret toqtatýǵa týra keldi. Boksshylardyń ekeýi de jaraqat aldy. Tóreshiler sheshimimen reseilik boksshy jeńiske jetti. Qorytyndy esep – 1:4.
Osylaisha, 23 jastaǵy álem chempiony Olimpiadadaǵy alǵashqy jekpe-jekte utylyp qaldy.
Oǵan deiin Qazaqstannyń áielder komandasy atynan Tokio Olimpiadasyna barǵan jalǵyz boksshy Nadejda Riabets (75 keli) birinshi jekpe-jekte utylsa, Serik Temirjanov (57 keli) ekinshi ainalymnan asa almady. Keshe 69 keli salmaq dárejesinde Abylaihan Júsipov amerikalyq boksshyǵa jol berdi. Al Vasilii Levit (91 keli) nokaýtpen utyldy.
Olimpiadada tórt boksshymyz qaldy. Zakir Safiýllin (63 keli) men Sáken Bibosynov (52 keli) alǵashqy jekpe-jekterin sátti ótkizgen. Sondai-aq, aldaǵy ýaqytta Ábilhan Amanqul (75 keli) men Qamshybek Qońqabaevtyń (91 keliden joǵary) jekpe-jekteri bar.
