Tokio Olimpiadasynda qazaqstandyq Sáken Bibosynovtyń (52 keli) jartylai finalda kimmen kezdesetin belgili boldy, dep habarlaidy "Ult aqparat".
Eske salsaq, búgin shirek finalda qazaqstandyq sportshy ispaniialyq Gabriel Eskobardan 3:2 esebimen basym tústi. Endi onyń jartylai finaldaǵy qarsylasy - ulybritaniialyq Galal Iafai.
Ol 1992 jyly 11 jeltoqsanda dúniege kelgen. Budan buryn dúniejúzilik deńgeide jetistikke jete qoiǵan joq.
Galal Iafai búgin shirek finalda álem chempionatynyń úsh márte júldegeri atanǵan kýbalyq boksshy Iosvani Veitiiany 4:1 esebimen qapy qaldyryp ketti. Odan buryn armeniialyq Koriýn Solomoniandy, odan keiin zambiialyq Patrik Chinembany jeńdi.
Jartylai final 5 tamyz kúni ótkiziledi.
Eske salsaq, biylǵy Olimpiadaǵa bokstan erler quramasynan 8 sportshy bardy. Sákennen ózge budan buryn jartylai finalǵa Qamshybek Qońqabaev (91 keliden joǵary) shyqqan bolatyn. Búgin taǵy bir qazaqstandyq Zakir Safiýllin (63 keli) shirek final oiynyn ótkizedi.
