24 tamyz ben 5 qyrkúiek aralyǵynda Tokio-2020 XVI Jazǵy paralimpiada oiyndary ótedi, dep habarlaidy "Ult aqparat".
Bul synǵa Qazaqstannyń atynan 25 paralimpiadashy qatysyp, sporttyń 7 túri boiynsha el namysyn qorǵaidy.
«Paralimpiada oiyndary qarsańynda «Qazaqstannyń Paralimpiada sportyn qoldaimyz» chellendji bastaldy. Rio-2016 Paralimpiada oiyndarynan keiin elimizde parasportpen ainalysqysy keletinderdiń sany artty, óńirlerde múgedek adamdarǵa arnalǵan jańa sport mektepteri ashyldy jáne elordada ýltrazamanaýi paralimpiadalyq jattyǵý ortalyǵy salyndy. Onda múmkindigi shekteýli adamdar ózine qolaily sport túrimen tegin ainalysa alady», - dep jazylǵan Ulttyq paralimpiada komiteti Marketing jáne kommýnikatsiia departamentiniń habarlamasynda.
Komitet jariialaǵan chelledjge qatysý úshin paralimpiadashylarǵa qoldaý bildergen mazmundaǵy beineúndeý túsirip, áleýmettik jelige NPK @kazparalympics resmi akkaýntyn belgileý arqyly myna heshtegtermen salý qajet: #teamkz, #kazparalympics jáne #parateamkz.
Chellendjge birinshi bolyp Nurlan Qoianbaev, Arýjan Sain, Maqpal Isabekova, Móldir Áýelbekova, Beibit Qorǵan, Erlan Kókeev, Baqyt Syzdyqova siiaqty tanmal adamdar ún qosqan.
Eske salaiyq, 29 shilde kúni QR Prezidenti Qasym-Jomart Toqaev Qazaqstan Ulttyq paralimpiada qurama komandasynyń múshelerimen kezdesken bolatyn.
Memleket basshysy sportshylardyń Táýelsiz Qazaqstan tarihynda alǵash ret Paralimpiada oiyndaryna 25 joldama utyp, bairaqty básekege úlken qurammen attanyp bara jatqanyn atap ótti.
«Álemdegi júz myńdaǵan sportshynyń arasynan úzdik shyǵyp, osy oiyndarǵa joldama alý ekiniń biriniń qolynan kele bermeidi. Sizder buǵan tabandylyq pen kásibi daiyndyqtyń arqasynda qol jetkizýge bolatynyn dáleldedińizder. Demek, árbir para sportshymyzdy qazirdiń ózinde jeńimpaz deýge bolady. Ózderińizdi barsha otandasymyz maqtan tutady», – degen edi Q. Toqaev.
Tokio-2020 Jazǵy Olimpiada oiyndary 23 shilde - 8 tamyz aralyǵynda ótken bolatyn.
Dúbirli dodaǵa Qazaqstan atynan 97 atlet sporttyń 28 túrinen baq synady. Nátijesinde 8 qola medal jeńip aldy.
Al medaldar kectesinde elimiz 83-orynǵa turaqtady.
