Qazaqstandyq balýan Nurislam Sanaev Tokio Olimpiadasynyń erkin kúres jarysynda finalǵa shyǵa almady, - dep habarlaidy "Ult aqparat".
Jartylai finalda Sanaev úndistandyq Kýmar Ravimen kezdesti. Qazaqstandyq balýan qarsylasyn 9:2 esebimen jeńip turyp, jaraqat alyp qalýyna bailanysty sońǵy sátterde qarsylasyna ese jiberip qoidy. Endi ol qola medal úshin tartysqa túsedi.
Buǵan deiin shirek finalda Sanaev japon Iýki Takahasiden basym túsken. Al 1/8 finalda Sanaev Gvineia-Bisaý ókili Diamantino Iýna Fafeni senimdi jeńgen edi.
30 jastaǵy Sanaev Reseidiń Chadan qalasynda týǵan. 2014 jyly Qazaqstan azamattyǵyn alyp, Aqtóbe oblysy atynan óner kórsete bastady. 2016 jyly Rio Olimpiadasyna qatysyp, alǵashqy jekpe-jeginde jeńilgen. Biraq keiin jubanysh jekpe-jegine shyǵyp, taǵy da qarsylasyna jol bergen edi.
Keiin 2017 jylǵy álem chempionatynda kúmis, 2019 jyly qola medal alǵan. 2018 jyly Aziia chempiony atanǵan.
Eske salaiyq, qazir Qazaqstan qorjynynda tórt medal bar. Dziýdoshy Eldos Smetov, aýyratletter Igor Son men Zúlfiia Chinshanlo qola medal ielengen bolatyn. Al búgin boksshy Qamshybek Qońqabaev jartylai finalda jeńilip, qola medal alǵan.
