Japoniia astanasy Tokio qalasynda ótip jatqan Olimpiada oiyndarynda 25 shildedegi medaldar esebi jariialandy, dep habarlaidy QazAqparat.
Aita keteiik, qazir Qazaqstan quramasynyń qorjynynda qos qola medal bar.
Alǵashqysyn 24 shildede dziýdoshy Eldos Smetov alsa, ekinshisine búgin, 25 shildede aýyr atlet Igor Son qol jetkizdi.
Osylaisha eki medal alǵan el quramasynyń jalpy komandalyq esepte qai orynǵa jaiǵasqany belgili boldy.
Qazirge deiin 40 memleketten kelgen sportshylar birtalai medalǵa qol jetkizip úlgerdi.
Olardyń arasynda 2 qola medal alǵan Germaniia, Túrkiia, Ýkraina quramalary 31-34 oryndardy ózara bólisip tur. Qazaqstan 31-oryndy enshilegen.
Medal alý jóninen Qytai kósh bastap tur. Onyń enshisinde 6 altyn, 1 kúmis, 4 qola medal bar.
Tokio Olimpiadasynan 25 shildede medal alǵan el quramalarynyń alǵashqy ondyqtaǵy kestesi tómendegishe:
1. Qytai - 6-1-4
2. Japoniia - 5-1-0
2. AQSh - 4-2-4
4. Ońtústik Koreia - 2-0-3
5. Resei- 1-4-2
6. Italiia - 1-1-3
7. Avstraliia- 1-1-1
7. Frantsiia- 1-1-1
9. Vengriia - 1-1-0
10. Týnis - 1-1-0
Biyl dúbirli dodada 33 sport túrinen 339 medal jiyntyǵy sarapqa salynady. Aitýly alamanǵa jer betindegi 206 memleketten 11 myńnan astam sportshy qatysýda.
Qazaqstandyq 97 sportshy kúnshyǵys elinde sporttyń 28 túrinen baq synaidy.
Eske salsaq, Tokio Olimpiadasy 23 shildede bastaldy. Ol 8 tamyzda máresine jetedi.
Buǵan deiin Qazaqstan quramasy alty Jazǵy Olimpiadada baq synady. Jalpy alǵanda 21 altyn, 28 kúmis, 64 qola medal aldy.
