Tokio Olimpiadasynda qazaqstandyq Qamshybek Qońqabaev (91 keliden joǵary) jartylai finalda AQSh boksshysy Richard Torrezben qolǵap túiistirdi, dep habarlaidy "Ult aqparat".
Jartylai finalda jerlesimiz amerikalyq boksshy Richard Torrespen kezdesti. Jekpe-jektiń birinshi raýndynda amerikalyq boksshynyń basymdyǵy ańǵaryldy. Bas kezinde Qońqabaev qashyp bokstasty. Joiqyn soqqylaryn sheber oryndai bildi. Qarsylasy da qarap qalǵan joq. Degenmen birinshi raýndta bes tóreshiniń tórteýi amerikalyq boksshyǵa joǵary upai berdi. Al ekinshi raýndtyń sońynda Qońqabaev nokdaýnǵa túsip qaldy.
Úshinshi raýndta ekeýi ashyq bokstasty. Biraq qazaqstandyq sportshy eshteńe ózgerte almady. Aýyr jaraqat alyp qaldy. Sodan dáriger jekpe-jekti toqtatýǵa sheshim qabyldady. Osylaisha Qońqabaev qola júldeni qanaǵat tutty.
Qazaqstandyq boksshy budan buryn mysyrlyq Iýsri Rezk Mustafa Hafez ben reseilik Ivan Veriasovty jeńdi.
Búgingi qarsylysy Richard Torrez 1999 jyly 1 maýsymda dúniege kelgen. Qazirge deiin áýesqoi boksta 60 jekpe-jek ótkizip, onyń 51-de jeńiske jetken. 2016 jyly jastar arasyndaǵy álem chempionatynda qola júldeger atandy. Al 2019 jyly Panamerikan oiyndarynda da dál sol jetistigin qaitalady. 2019 jylǵy álem chempionatynda ol shirek finalda qarsylasyna nokaýtpen utyldy. Ázirge basqa qol jetkizgen tabystary joq.
Atalǵan salmaqta ózbekstandyq Bahodir Jalolov jartylai finalda ulybritaniialyq Freizer Klarkty jeńip, finalǵa joldama aldy.
Eske salsaq, biylǵy Olimpiadaǵa erler quramasynan 8 sportshy bardy. Olardyń arasynan Qamshybekten ózge Sáken Bibosynov (52 keli) 5 tamyzda jartylai final oiynyn ótkizedi.
