Tokio Olimpiadasynda synǵa túsip jatqan tennisshi Elena Rybakina shirek finalǵa joldama aldy, dep habarlaidy "Ult aqparat".
Qazaqstandyq tennisshi 1/8 finalda horvatiialyq Donna Vekichpen sheberlik baiqasty.
Qarsylasyn eki sette 7:6, 6:4 esebimen jeńip, shirek finalǵa shyqty.
Endi ol ispaniialyq Garbine Mýgýrýsomen taitalasqa túsedi.
Aita keteiik, alǵashqy kezdesýlerinde ol avstraliialyq Samanta Stosýr (6:4, 6:2) jáne shvetsiialyq Rebekka Peterson (6:2, 6:3) syndy qarsylastaryn qapy qaldyryp ketti.
Tennisten Qazaqstan áielder quramasynda buǵan deiin Zarina Diias, Iaroslava Shvedova jáne Iýliia Pýtintseva jarys jolynan shyǵyp qaldy.
Sondai-aq, búgin Mihail Kýkýshkin erler arasynda 1/8 finalda belarýstik Ilia Ivashkoǵa ese jiberdi.
Biyl dúbirli dodada 33 sport túrinen 339 medal jiyntyǵy sarapqa salynady. Aitýly alamanǵa jer betindegi 206 memleketten 11 myńnan astam sportshy qatysýda.
Qazaqstandyq 97 sportshy kúnshyǵys elinde sporttyń 28 túrinen baq synaidy.
