"Toqalyńa chemodan satyp al, báibishege - tegin" dál osyndai jarnama mátinimen tanymal saýda oiyn-saýyq ortalyǵy kelýshiler arasynda baiqaý uiymdastyrmaq bolǵan. Alaida jarnama áleýmettik jelige jariialanǵannan keiin qazaqstandyq qoldanýshylar arasynda daý týdyrdy, dep habarlaidy "Ult aqparat".
"Kózin qurtyńdar! Qoǵam aldynda jaýap berińder. Bireýge bul aýyr taqyryp. Etika turǵysynan jaýap beresińder", "Qai marketologtyń ideiasy eken?", "Zańdy buzdy. Biz órkenietti elde ómir súrip jatyrmyz, al bizdiń memleketimizde qarym-qatynasty rásimdegen azamattardyń burynǵy nekelerin buzbai jańa otbasyn qurýǵa quqyǵy joq", "Nege osyǵan jol beresizder? Otbasy qundylyqtaryn joiý úshin be?", – dep jeli qoldanýshylary renishin aitty.
Keleńsiz máselege qatysty Almaty ákimdigi ókilderi jaýap berdi.
"Qala qurylysy jáne ýrbanistika bóliminiń málimetine sai, joǵaryda atalǵan mekenjai boiynsha syrtqy (kórneki) jarnamany ornalastyrý kezinde basqarmaǵa syrtqy (kórneki) jarnamany ornalastyrý týraly habarlama jiberilmegen", – dep jaýap berdi Almaty ákimdiginiń ókili.
Alaida Grand Park saýda ortalyǵynyń ákimshiligi máselege esh jaýap qatpady. Degenmen, baiqaý týraly jazbany paraqshasynan óshirip tastaǵan.
Al búgin áiel isteri jáne otbasylyq-demografiialyq saiasat jónindegi ulttyq komissiianyń ókili Nazym Janǵazinova «Toqal» týraly jarnama jasaǵan Almatydaǵy Grand Park oiyn-saýyq ortalyǵynyń ákimshiligi jazaǵa tartylatyn aitty. Olarǵa 100 AEK (369 200 teńge) deiin aiyppul salynady.
«Toqal» qubylysyn nasihattaityn jáne dástúrli otbasylyq qundylyqtarǵa qaishy keletin jarnamany jasaýǵa bolmaidy. Onyń jolyn erte kesý kerek. Jarnamany alyp tastady. Grand Park oiyn-saýyq ortalyǵynyń ákimshiligi QR ÁQBtK 505-baby boiynsha ákimshilik jaýapkershilikke tartylady», — dep jazdy Nazym Janǵazinova.
