Qazaqstan Respýblikasynyń Prezidenti Qasym-Jomart Toqaevtyń tóraǵalyǵymen Joǵary eýraziialyq ekonomikalyq keńestiń kezekti otyrysy video konferentsiia rejiminde ótti, dep habarlaidy Aqordanyń resmi saity.
Jiynda Joǵary eýraziialyq ekonomikalyq keńestiń Qurmetti tóraǵasy, Qazaqstannyń Tuńǵysh Prezidenti – Elbasy Nursultan Nazarbaev, Resei Federatsiiasynyń Prezidenti Vladimir Pýtin, Belarýs Respýblikasynyń Prezidenti Aleksandr Lýkashenko, Qyrǵyz Respýblikasynyń Prezidenti Sadyr Japarov, Armeniia Respýblikasy Premer-Ministriniń mindetin atqarýshy Nikol Pashinian, Eýraziialyq ekonomikalyq komissiia alqasynyń tóraǵasy Mihail Miasnikovich, sondai-aq, Joǵary eýraziialyq ekonomikalyq keńes janyndaǵy baqylaýshy memleketterdiń basshylary Kýba Respýblikasynyń Prezidenti Migel Dias-Kanel Bermýdes jáne Ózbekstan Respýblikasynyń Prezidenti Shavkat Mirziioev sóz sóiledi.
Memleket basshysy óz sózinde pandemiia men oǵan qarsy kúres sharalary jahandaný úderisi men beibit tynys-tirshiliktiń qalpyn ózgertkenin atap ótti. Mundai jaǵdaida ekonomikalyq daǵdarystyń saldaryn eńserý, ekonomikany qaita qalpyna keltirý jáne damytý jolyna túsý siiaqty óte ózekti máselelerdiń tiimdi sheshimin tabý qajet.
– Eýraziialyq ekonomikalyq odaq organdaryna Qazaqstannyń tóraǵalyq etýine bailanysty meniń Joldaýymda bizdiń integratsiiany damytýdyń 5 basymdyǵy aiqyndalǵan.
Biz osy Odaq tarihynda alǵashqy strategiialyq qujatty júzege asyrýdy bastadyq. Atalǵan strategiia orta merzimdi perspektivadaǵy integratsiianyń jáne ekonomikanyń barlyq salasyndaǵy naqty yqpaldastyqtyń, sondai-aq, halyqaralyq yntymaqtastyqtyń basymdyqtaryn aiqyndap berdi. Sondyqtan Odaqty damytý strategiiasynyń sapaly ári jedel iske asyrylýyn qamtamasyz etý mańyzdy. Bul, árine, ózimizge bailanysty, – dedi Qazaqstan Prezidenti.
Qasym-Jomart Toqaev daǵdarystan keiingi qaita qalpyna keltirý kezeńinde ózara saýda-sattyqqa qatysty kedergilerdiń qordalanǵan problemasyn júieli sheshý qajet ekenin aitty. Lokdaýndar kezinde mundai kedergiler edáýir kóbeigen.
– Atalǵan kedergiler saýda-ekonomikalyq qatynastardyń damýyn aitarlyqtai tejep, ósim áleýeti men damýyn shekteidi. Qazaqstan Odaqtyń basqa músheleri siiaqty, naryqtyń barlyq qatysýshylary úshin teńdei jáne kemsitpeitin jaǵdai qalyptastyrýdy qoldaitynyna senimdimin. Komissiia kedergilermen turaqty túrde kúresip keledi. Alaida, olardy tiimdi dep aita almaimyz. Bul ulttyq deńgeide qabyldanǵan sheshimderdiń saldarymen kúres, – dedi Qazaqstan Prezidenti.
Memleket basshysy óz sózinde BUU-nyń málimetine júgindi. Prezidenttiń aitýynsha, 2020 jyldyń qorytyndysyna sáikes azyq-túlik taýarlarynyń álemdik baǵasy sońǵy úsh jylda eń joǵary deńgeige jetken. 2030 jylǵa qarai azyq-túlikke degen suranys 35 paiyzdan asady dep boljanýda.
– Odaqqa múshe árbir eldiń azyq-túlik taýarlaryn óndirý kólemin arttyrýǵa áleýeti jetedi. Sonymen qatar ishki naryqty qorǵaý jónindegi shekteý sharalary agroónerkásip kesheniniń damýyn tejep, azyq-túlik tapshylyǵyna ákep soqtyrýy múmkin. Árine, keibir jekelegen jaǵdailarda olardyń ýaqytsha qoldanylýy ózin aqtady. Degenmen mundai shekteýlerdiń bizdiń Odaqqa múshe elderge qatysy bolmaýy tiis dep sanaimyn, – dedi Qasym-Jomart Toqaev.
Prezident agrarlyq ǵylymi mekemeler arasyndaǵy yqpaldastyqty kúsheitýdi, aýyl sharýashylyǵy ónimderin úshinshi elderdiń naryǵyna eksporttaý isin ulǵaitý sharalaryn jandandyrýdy usyndy. Memleket basshysynyń aitýynsha, Qazaqstan Odaqqa múshe eldermen birge shekara mańy infraqurylymyn damytýǵa daiyn.
Bul rette Qasym-Jomart Toqaev Ózbekstanmen birlesip júzege asyrylyp jatqan «Ortalyq Aziia» halyqaralyq saýda-ekonomikalyq ortalyǵy jobasyn mysalǵa keltirdi. Sondai-aq Odaq aiasynda saýda-logistikalyq jáne kóterme-taratý ortalyqtarynyń júiesin qurýdyń mańyzy artyp otyr. Mundai júie memleketterdiń azyq-túlik qaýipsizdigin qamtamasyz etýge, agroónerkásip sektorynyń áleýetin qoldaýǵa, shyǵyndardy azaitýǵa, sáikesinshe, negizgi azyq-túlikterdiń baǵasyn tómendetýge múmkindik beredi.
– Eýraziia elderi ózderiniń tranzittik áleýetin tolyq júzege asyrýy kerek. Men kólik kúre joldaryndaǵy transshekaralyq ýchaskelerdi jańǵyrtý jónindegi jumystardy jandandyrýdy, atap aitqanda, Eýraziialyq ekonomikalyq odaqtyń barlyq aýmaǵynda «Batys Eýropa – Batys Qytai» avtomagistraliniń qurylysyn aiaqtaýdy taǵy da usynamyn, – dedi Memleket basshysy.
Qasym-Jomart Toqaev Eýraziialyq ekonomikalyq odaq elderimizdiń daǵdarystan keiingi ekonomikasyn qaita qalpyna keltirýdiń qýatty ári pármendi faktory bolatynyna senim bildirdi. Qazaqstan Odaqty ekonomikalyq integratsiianyń tiimdi jáne bedeldi uiymyna ainaldyrý úshin barynsha kúsh salady.
Qazaqstan Prezidenti jiyn sońynda qatysýshylarǵa mazmundy jáne konstrýktivti baiandamalary úshin rizashylyǵyn bildirdi.
