Ádilet ministri Qanat Mýsin Prezidenttiń jaqyn týystaryn basshylyq qyzmetke taǵaiyndaýǵa tyiym salý máselesin túsindirdi, dep habarlaidy Sputnik Qazaqstan.
Aita keteri, Qazaqstanda sýperprezidenttik basqarý formasynan bas tartý aiasynda Prezidenttiń birqatar ókilettigin qysqartý josparlanyp otyr. Sonyń ishinde jaqyn týystarynyń memlekettik saiasi qyzmetshiler men kvazimemlekettik sektor kásiporyndary basshysy laýazymyn atqarýyna tyiym salý sharasy da bar.
"Zańnamada jaqyn týystarǵa ata-analar, balalar, asyrap alýshylar, asyrap alynǵandar, ata-anasy bir jáne ata-anasy bólek aǵaly-inili men apaly-sińlili, atasy, ájesi jáne nemereleri jatady. Sonymen qatar, sybailas jemqorlyqqa qarsy is-qimyl týraly zańnamada jekjattar, iaǵni, erli-zaiyptynyń jaqyn týystary úshin shekteýler belgilengen", - dedi Mýsin ortalyq kommýnikatsiialar qyzmetinde ótken brifingte.
Ministr memlekettik saiasi jáne ákimshilik qyzmetshilerdiń tizimi Prezident jarlyǵymen bekitilgenin de eske saldy. Oǵan ministrler men olardyń orynbasarlary, ákimder, memlekettik organ basshylary jáne taǵy basqa mamandar kiredi. Al kvazimemlekettik sektorǵa memlekettiń úlesi bar uiymdar jatady.
"Zańnamalyq deńgeide tiisti tyiymdar belgilengennen keiin prezidenttiń aǵasy, ápkesi, balalary "Samuryq-Qazyna" qoryna kiretin uiymdarda nemese "Báiterek" siiaqty ulttyq kompaniialarda basshylyq qyzmetke ornalasa almaidy", - dep atap kórsetti Mýsin.
Onyń aitýynsha, tamyz aiyna deiin tiisti zań jobalary daiyndalady. Al jyldyń sońyna deiin qabyldanady degen jospar bar.
