Qasym-Jomart Toqaev óziniń sailaýaldy shtabynda bolyp, Exit poll qorytyndysyn jariialaý rásimine qatysty.
Esterińizge sala keteiik, Exit poll-dyń qorytyndysyna sáikes prezident sailaýynda Nur Otan partiiasynan túsken kandidat ózge úmitkerlerden aitarlyqtai joǵary daýys jinaǵan.
Saýalnama nátijesinde Qasym-Jomart Toqaev sailaýshylardyń 70,13 paiyz daýysyn alǵany anyqtaldy. Halyqtyń sailaýǵa kelý kórsetkishi 77,4 paiyzdy qurap, 9 millionnan astam qazaqstandyq óz tańdaýyn jasady.
Aldyn ala málimet jariialanǵannan keiin Qasym-Jomart Toqaev ózine senim bildirgen barsha otandasyna alǵysyn bildirdi, dep habarlady prezidenttikke kandidattyń resmi saity.
"Sailaýaldy naýqan órkenietti ári júieli túrde júrgizildi. Shyn máninde bul naýqan baǵdarlamalardyń básekesi boldy. Halyq bizge senim artyp, óz tańdaýyn jasady. Sondyqtan aldymyzda aýqymdy jumystar kútip tur", – dedi Toqaev.
Ol úgit-nasihat kezeńine qatysqan respýblikalyq qoǵamdyq shtabtyń múshelerine, belsendi azamattarǵa jáne partiia jaqtastaryna atqarǵan jumystary úshin alǵysyn bildirip, elektoraldy naýqannyń aýqymy men tehnologiialyq múmkindigin atap ótti.
"Búkil álemdegi siiaqty bizdiń elimizde de jaǵdaidyń ózgergenin kórip otyrsyzdar. Álemdik qaýymdastyqtyń bir bólshegi bolǵandyqtan Qazaqstanǵa jahandyq oqiǵalardyń da yqpaly bolary sózsiz. Sondyqtan biz elimizdiń jarqyn bolashaǵy úshin judyryqtai jumylýymyz kerek", – dedi memleket basshysy.
Jinalǵandarǵa arnaǵan sózinde Qasym-Jomart Kemeluly Qazaqstannyń búgingi jetistikteri Elbasy esimimen tyǵyz bailanysty ekenin aitty.
"Qazaqstannyń Tuńǵysh prezidenti – Elbasy Nursultan Ábishuly Nazarbaev búkil álem moiyndaǵan qýatty, kóp ultty memleket qurdy. Bizdiń endigi mindetimiz – qoldaǵy barymyzdy qadirlep, jetistikterimizdi saqtap, órleý men jasampazdyq jolynda bolashaqqa batyl qadam basý", – dedi Q.Toqaev.
Respýblikalyq qoǵamdyq shtabtyń jetekshisi, «Nur Otan» partiiasy Tóraǵasynyń Birinshi orynbasary Máýlen Áshimbaev aldaǵy ýaqytta partiianyń Elbasy jolyn ári qarai jalǵastyryp, sailaýaldy baǵdarlamany júzege asyrý úshin bar kúsh-jigerin jumsaitynyn aitty.
"Búgin qazaqstandyqtardyń basym bóligi bizdiń kandidatymyz Qasym-Jomart Toqaevqa daýys berý arqyly Elbasy saiasatynyń sabaqtastyǵyna jáne birlik pen turaqtylyqqa qoldaý bildirdi", – dedi M.Áshimbaev.
Sonymen qatar is-sharada respýblikalyq shtabtyń músheleri, aimaqtyq shtabtar men «Team Qazaqstan» jastar qanatynyń ókilderi sóz sóiledi. Olar exit-pool-dyń nátijesine biraýyzdan qoldaý bildirip, Qazaqstan halqyn ótken Prezident sailaýymen quttyqtady.
Aita ketý kerek, sailaýaldy naýqan kezinde kandidattyń elimiz boiynsha 228 shtaby jumys istedi.
