Jergilikti qamtý jónindegi óńirlik komissiialardyń jumysy «túrtip qoiý» úshin ǵana júrgiziledi. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat" Aqorda baspasóz qyzmetiniń Twitter-degi paraqshasyna silteme jasap.
«Infraqurylymdyq memlekettik baǵdarlamalar aiasynda ákimder men ministrler jergilikti qamtý úlesin 90 paiyzǵa deiin jetkizý mindettemesin alǵan. Jyl saiyn bul memlekettik baǵdarlamalardy qarjylandyrý kólemi shamamen 2,8 trln teńgeni quraidy. Iaǵni, bizdiń ekonomikamyzǵa 2,5 trln teńge quiylýy tiis», - dep atap ótti QR Prezidenti.
Osy oraida Memleket basshysy is júzinde mundai jait kórinis bermei otyrǵanyn synady.
«Josparlaýdyń, eseptilik pen esepke alýdyń biryńǵai júiesi joq. Memlekettik organdar men bas merdigerlerdiń qatań jaýapkershiligi de is júzinde bolmai otyr. Jergilikti qamtý jónindegi óńirlik komissiialardyń jumysy «túrtip qoiý» úshin ǵana júrgiziledi», - dedi Qasym-Jomart Toqaev.
Aita keteiik, videobailanys arqyly ótip jatqan jiynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomikalyq damý qorytyndysy týraly esep berdi. Sondai-aq koronavirýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boiynsha bergen tapsyrmalary men mindetteri qarastyryldy.
Elimizdiń áleýmettik-ekonomikalyq damýynyń qorytyndylary men jyl sońyna deiin oryndaityn mindetter jóninde Premer-Ministr Asqar Mamin, aqsha-nesie saiasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epidemiologiialyq ahýaldy jaqsartý jónindegi sharalar týraly Densaýlyq saqtaý ministri Aleksei Tsoi baiandama jasady.
