Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysynda 2021-2025 jyldarǵa arnalǵan jekeshelendirý josparynyń jobasy tanystyryldy, dep habarlaidy "Ult aqparat".
QR Prezidentiniń buǵan deiingi tapsyrmasyna sáikes, tolyǵymen jáne ishinara jeke básekeli sektorǵa beriletin úiymdardyń tizimi 176-dan 736-ǵa deiin uzartyldy.
Básekeli ortaǵa 5 trln teńgelik aktivterdi berý arqyly memlekettiń ekonomikaǵa aralasý kórsetkishin 14 paiyzǵa azaitýǵa bolady. Onymen qosa, strategiialyq investorlardy tarta otyryp, jekeshelendiriletin kompaniialardyń qyzmetine ShOB-tyń qoljetimdiligi arta túsedi.
Memleket basshysy ekonomikaǵa memlekettiń aralasý úlesin azaitý jospary týraly aita kele, budan buryn ótkizilgen kampaniialardan alynǵan tájiribeni eske saldy. Ol kampaniialar barysynda nysandardyń basym bóligin jekeshelendirý máselesi keiinge aýystyrylyp, keibiri tipti toqtap qalǵan edi.
«Jumystyń jospar boiynsha júrýi asa mańyzdy. Bul turǵyda Úkimettiń ustanymy qatań bolýy qajet. Jekeshelendirýdiń sońy jeke monopoliialardyń paida bolýyna ákep soqtyrmaýy kerek. Ondai jaǵdai qoǵamnyń narazylyǵyn týdyrady. Jekeshelendirý úderisi kezinde ashyqtyq pen ádildikti qamtamasyz etý qajet», – dedi Q.Toqaev.
Osy rette Prezident Úkimetke nysandardy satýǵa qoǵamdyq monitoring júrgizýdiń tetikterin ázirleýdi tapsyrdy.
Aita ketsek búgin Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysy ótti.
Is-sharanyń kúntártibine Qazaqstan Respýblikasyn 2025 jylǵa deiin damytýdyń ulttyq josparyn, memlekettik josparlaýdyń jańa júiesin, 2030 jylǵa deiin memlekettik bsqarýdy damytý tujyrymdamasyn, 2021-2025 jyldarǵa arnalǵan jekeshelendirý josparyn ázirleý, sonymen qatar shuǵyl reformalar toptamasy men halyqtyń ulttyq sanaǵyn ótkizý máseleleri kirdi.
