Qazaqstan Prezidenti – Qazaqstan Qarýly Kúshteriniń Joǵarǵy Bas qolbasshysy V «Aibyn» respýblikalyq áskeri-patriottyq jastar jiynynyń ashylýyna qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev áskeri-patriottyq jiynǵa qatysýshylardy quttyqtap, ótkizilip otyrǵan is-sharanyń erekshe mańyzyn atap ótti. Sondai-aq, bul jiynnyń elimizdiń eń senimdi, jaýapty, otanshyl ári batyl jastarynyń basyn qosyp otyrǵanyn aitty.
– Biz Táýelsiz elimizdiń laiyqty jastaryna zor úmit artamyz. Dástúrge ainalǵan «Aibyn» áskeri-patriottyq jiyny Otanymyzdyń qorǵaýshysy bolýǵa shaqyrylǵan jastar úshin biregei alań bolyp sanalady, – dedi Memleket basshysy.
Qazaqstan Prezidenti memleket tarapynan jastardy qoldaýǵa jáne olardyń áleýetterin júzege asyrýyna jaǵdai jasaýǵa erekshe kóńil bólinetinin atap ótip, jastar damýdyń simvoly jáne jarqyn bolashaqqa degen úmittiń kórinisi ekenine nazar aýdardy. Sondyqtan, Elbasynyń 2019 jyldy «Jastar jyly» dep ataǵany kezdeisoq emestigin aitty.
– Jastar el ómirine belsendi aralasyp, azamattyq qoǵamnyń damýyna jáne elimizdi tabysty jańǵyrtýǵa septigin tigizýde. Elimizde Qazaqstan jastarynyń boiynda otanshyldyq rýhty qalyptastyryp, tárbieleýge airyqsha kóńil bólinedi. Osyǵan orai, «Jas sarbaz» respýblikalyq balalar men jasóspirimderdiń áskeri-patriottyq qozǵalysy quryldy. Barlyq óńirde bul uiymnyń bólimsheleri jasaqtalyp, jumys istep jatyr. «Jas sarbazdyń» áskeri-patriottyq klýbtary men synyptarynyń sany 6 myńǵa jetip, 174 myńnan astam balany qamtydy, – dedi QR Qarýly Kúshteriniń Joǵarǵy Bas qolbasshysy.
Memleket basshysy jastardy árqashan barlyq azamattarymyzdy biriktiretin ortaq qundylyqtarǵa – jasampaz eńbekke, beibitshilik pen kelisimge, halyqtyń birligine, Otanǵa degen maqtanysh sezimge jáne onyń uly taǵdyryna alańdaýshylyq bildirýge shaqyrdy.
– Men batyl urpaq ósip kele jatqanyn kórip turmyn. Sizder zamanaýi Qazaqstannyń biik murattary negizinde tárbie aldyńyzdar. Ózderińizdiń bilimderińizben jáne qajyrly eńbekterińizben Otanymyzdyń – Máńgilik elimizdiń dańqyn shyǵarasyzdar. Sizderdiń Táýelsizdik qundylyqtaryn dáripteitinderińizge, el jetistikteriniń tabysty estafetasyn abyroimen alyp júrýdi jalǵastyratyndaryńyzǵa senemin, – dedi Qazaqstan Prezidenti.
Qasym-Jomart Toqaev jastarǵa arnaǵan sózinde ár adamnyń ómirine qajetti qasietter týraly aitty. Memleket basshysynyń pikirinshe, eń aldymen, parasattylyq, bilim, kásibilik pen Otanǵa degen adaldyq qajet.
– Sizderde kúsh, energiia men shyǵarmashylyq áleýeti zor. Osynyń bárin ómirdegi basty maqsattaryńyzǵa qol jetkizýge jumsańyzdar. Elimiz árqaisyńyzdyń tabysty bolǵandaryńyzǵa múddeli. Sebebi, sizderdiń jetistikterińizden tutas eldiń jetistigi qalyptasady. Sizderdiń oi-maqsattaryńyzdyń júzege asýyna shyn júrekten tilekshimin, – dedi Memleket basshysy.
QR Qarýly Kúshteriniń Joǵarǵy Bas qolbasshysy sóziniń sońynda «Aibyn» respýblikalyq áskeri-patriottyq jastar jiynyn ashyq dep jariialap, qatysýshylardyń oqýyna sáttilik, myqty densaýlyq pen tabys tiledi.
«Aibyn» bairaǵyn kóterý rásiminen jáne jarys pen kontserttik baǵdarlamany ádil ótkizýge saltanatty ant bergennen keiin Qasym-Jomart Toqaev 2050 jyldyń «Jas sarbaz» qozǵalysyna qatysýshylarǵa arnalǵan «ýaqyt kapsýlasyn» qalaýǵa qatysty.
Qazaqstan Prezidentine qarý-jaraq túrleri, qurlyq áskerleri men áýe qorǵanys kúshteri tehnikalarynyń múmkindikteri tanystyryldy. Sondai-aq, Memleket basshysy dalalyq lagermen tanysyp, qatysýshylardyń jatyn ornyn kórdi, áskeri-patriottyq klýbtardyń tárbielenýshilerimen áńgimelesti.
