Foto: Aqorda
Prezident Qasym-Jomart Toqaev jasandy intellektini el ekonomikasyna keńinen engizýdiń basym baǵyttaryn aiqyndap berdi. Bul týraly Aqorda habarlady.
Memleket basshysy jasandy intellektiniń strategiialyq mańyzy onyń aýqymymen emes, naqty sektorǵa qanshalyqty tiimdi yqpaldasa alýymen ólshenetinin atap ótti. Onyń aitýynsha, qazirgi tańda tehnologiialyq paradigmalar túbegeili ózgerip, jasandy intellektini naqty ýaqyt rejiminde qoldaný ekonomikalyq ósimniń negizgi draiverine ainalyp otyr.
Prezident derekterdi, óndiristik úderister men adami resýrstardy biriktiretin birtutas júie qalyptastyrýdyń mańyzyn erekshe atap ótti. Mundai infraqurylym qurylǵan jaǵdaida ǵana pilottyq jobalardan asyp, jasandy intellektini ekonomikanyń barlyq salasyna engizýge jol ashylatynyn jetkizdi. Sonymen qatar, jahandyq tehnologiialyq básekede birde-bir el bul áleýetti jeke dara tolyq igere almaitynyn eskertti.
Memleket basshysynyń sózinshe, Jasandy intellektini damytý jónindegi keńes ekonomika men tsifrlyq platformalar salasynda úilestirilgen tásilderdi ázirleý jáne ozyq tájiribe almasý úshin qurylǵan.
Osyǵan bailanysty Prezident Keńestiń kelesi otyrysynda jasandy intellektini ónerkásipke engizý máselesin qarastyrýdy usyndy. Onyń pikirinshe, óndiris salasy – joǵary qosylǵan quny bar ónim shyǵaratyn ári jańa tehnologiialar synalatyn negizgi alań.
Bul rette taý-ken ónerkásibi, energetika, agroónerkásip jáne logistika salalaryndaǵy ónimdilikti arttyrý, shyǵyndardy azaitý jáne basqarý tiimdiligin jetildirýge basymdyq berý qajet ekeni aityldy.
Sondai-aq indýstriialyq derekterdi damytý, óndiristiń tsifrlyq telnusqalaryn engizý jáne protsesterdi jappai avtomattandyrý arqyly strategiialyq mindetterdi naqty iske ainaldyrý múmkindigi artatyny atap ótildi.
