Qasym-Jomart Toqaev Qazaqstan astanasyna resmi saparmen kelgen Japoniianyń Syrtqy ister ministri Ioshimasa Haiashidi qabyldady, dep habarlaidy "Ult aqparat" Aqordanyń resmi saityna silteme jasap.
Kezdesýde Qazaqstan men Japoniia arasyndaǵy saýda-ekonomikalyq, investitsiialyq jáne mádeni-gýmanitarlyq salalardaǵy keńeitilgen strategiialyq seriktestiktiń jai-kúii men damý perspektivalary, sondai-aq halyqaralyq qurylymdar aiasyndaǵy ózara is-qimyl máseleleri talqylandy.
Qasym-Jomart Toqaev Ioshimasa Haiashige iltipat bildirip, ekijaqty bailanystardy odan ári ilgeriletý úshin onyń bul saparynyń máni zor ekenin atap ótti.
– Japoniia – elimiz úshin dostas memleket. Biz ekijaqty qatynastardy joǵary baǵalaimyz. Biyl eki el arasyndaǵy qatynastardyń 30 jyldyǵyn atap ótemiz. Bul – tarihi beles. Osy kezeń ishinde konstrýktivti yntymaqtastyq ornattyq, strategiialyq seriktestikti keńeittik. Bul ózara atqarǵan jumystyń oń nátijesi, – dedi Qasym-Jomart Toqaev.
Qazaqstan men Japoniia arasyndaǵy yntymaqtastyqta ekonomikalyq qatynastar mańyzdy ról atqarady. Prezident saýda jáne investitsiialyq yqpaldastyqtyń áleýeti zor ekenine nazar aýdardy. Memleket basshysy Japoniiamen aradaǵy kópjaqty ekonomikalyq bailanystardy kúsheitýge nietti ekenin aitty. Budan bólek eki eldiń BUU aiasyndaǵy tabysty yqpaldastyǵyn, sondai-aq mádeni-gýmanitarlyq saladaǵy múmkindikterin joǵary baǵalady.
Qasym-Jomart Toqaev Japoniianyń Premer-ministri Fýmio Kishidany qolaily ýaqytta Qazaqstanǵa saparmen kelýge shaqyrǵanyn naqtylady. Memleket basshysynyń pikirinshe, joǵary deńgeidegi kezdesýlerdi uiymdastyrý úshin Qazaqstan men Japoniia arasyndaǵy yntymaqtastyqtyń qazirgi ahýaly men áleýetiniń berik negizi bar.
Óz kezeginde Ioshimasa Haiashi kezdesýge múmkindik bergeni úshin Qasym-Jomart Toqaevqa alǵys aitty. Ministr Japoniia Úkimetiniń Qazaqstanmen saýda-ekonomikalyq jáne investitsiia salalary boiynsha ózara tiimdi seriktestikti keńeitýge daiyn ekenin jetkizdi. Sondai-aq Ortalyq Aziia elderiniń ishinde Qazaqstanda japon kompaniialary kóp ekenin atap ótti.
Ioshimasa Haiashi Qasym-Jomart Toqaevtyń basshylyǵymen júzege asyrylyp jatqan aýqymdy reformalardy qoldady jáne Qazaqstannyń aýǵan halqyna gýmanitarlyq kómek kórsetý jónindegi kúsh-jigerine joǵary baǵa berdi.
Budan bólek áńgimelesý barysynda halyqaralyq jáne óńirlik kún tártibindegi ózekti máseleler talqylandy. «Ortalyq Aziia – Japoniia» formatyndaǵy dialogty odan ári damytýdyń mańyzdy ekeni atap ótildi.
