Prezident Qasym-Jomart Toqaev Energetika ministri Maǵzum Myrzaǵalievti qabyldady, dep habarlaidy Aqordanyń baspasóz qyzmeti.
Kezdesý barysynda Memleket basshysy elimizdegi janar-jaǵar mai qorynyń birden azaiyp ketýine jol bermeý qajet ekenin atap ótip, ishki naryqtaǵy jaǵdaidy osyndai keleńsizdikke ákep soqtyrǵan vedomstvolardyń jumysyn synǵa aldy. Prezident ónerkásip pen halyqty elektr energiiasymen úzdiksiz qamtamasyz etý, sondai-aq qosymsha óndiris qýaty kózderin qurý qajet ekenine nazar aýdardy.
Energetika ministri Prezidentke tapshylyqtyń ornyn toltyrý úshin qabyldanǵan shuǵyl sharalar týraly baiandady. Osyǵan bailanysty Atyraý munai óńdeý zaýytyndaǵy jóndeý jumystary 2022 jylǵa shegerilgen. Budan bólek Reseidiń Energetika ministrligimen kelissózder júrgizilip jatyr. Sonyń nátijesinde shamamen 150 myń tonna dizel otyny kórshi elden importtaldy. Maǵzum Myrzaǵalievtiń aitýynsha, qazirgi ýaqytta jaǵdai turaqtalyp keledi.
Sonymen qatar ministr Memleket basshysyna Qazaqstannyń elektr energetikasy salasyn damytýdyń 2035 jylǵa deiingi boljamdy teńgerimi jóninde aitty. Aldaǵy onjyldyqta elektr energiiasyn tutyný kórsetkishi jyl saiyn ósedi dep kútilýde. Osyǵan bailanysty jańartylatyn energiia kózderiniń, sondai-aq gaz jáne gidroelektr stantsiialary esebinen óndiris kólemin ulǵaitý josparlanyp otyr.
Memleket basshysyna tsifrlyq maining salasyn baqylaý úshin qabyldanyp jatqan sharalar tanystyryldy. Bul óz qyzmetin tirkeýsiz atqaratyn sýbektilerge qatysty. Ministr «sur» mainerler shamamen 1200 MVt-qa deiin elektr energiiasyn tutynatynyn jáne olardy anyqtaý jumystary jalǵasyp jatqanyn atap ótti.
Qasym-Jomart Toqaev Úkimetke, qajet bolǵan jaǵdaida, basqa da quzyrly organdardy tarta otyryp, atalǵan jumystardy jyldamdatýdy, sondai-aq mainingti zańnamalyq turǵydan retteý máselesin keiinge qaldyrmaýdy tapsyrdy. Bul rette «aq» mainerler óz qyzmetin qosymsha shekteýlersiz jalǵastyrady.
Memleket basshysy ishki naryqty sapaly janar-jaǵar maimen jáne úzdiksiz elektr energiiasymen qamtamasyz etý úshin Qazaqstannyń resýrsy mol ekenin aitty. Prezident Energetika ministrine júktelgen mindetterdi sheshý úshin tiisti sharalardy qabyldaý qajettigin tapsyrdy.
