Prezident Qasym-Jomart Toqaev jańadan taǵaiyndalǵan Qorǵanys ministrin tanystyrdy, dep habarlaidy "Ult aqparat" Aqordaǵa silteme jasap.
Qazaqstan Respýblikasynyń Prezidenti – Qarýly Kúshterdiń Joǵarǵy Bas qolbasshysy Qasym-Jomart Toqaev Qorǵanys ministrliginiń basshylyq quramymen keńes ótkizdi.
Memleket basshysy Qasym-Jomart Toqaev Murat Bektanovty Qorǵanys ministri laýazymynan bosatyp, bul qyzmetke Rýslan Jaqsylyqovty taǵaiyndaý týraly Jarlyqtarǵa qol qoiǵanyn habarlady.
Qasym-Jomart Toqaev jańa ministrdiń kadrlyq áskeri qyzmetker ekenin, arnaiy bilimdi Almaty Joǵary jalpyáskeri komandalyq ýchilishesinde oqyǵanyn, keiin M.V. Frýnze atyndaǵy akademiiada jáne Resei Federatsiiasy Qarýly Kúshteri Bas shtabynyń Áskeri akademiiasynda bilimin jalǵastyrǵanyn atap ótti.
– Onyń tájiribesi mol. Ishki áskerde 30 jyldan astam qyzmet etti. Ol qatardaǵy jaýyngerden bastap, ártúrli basshylyq qyzmetterdi atqardy. Ishki ister ministriniń orynbasary – Ulttyq ulannyń Bas qolbasshysyna deiingi áskeri joldan ótti, – dedi Prezident.
Qasym-Jomart Toqaev Qarýly Kúshterge degen talaptyń kúsheie túskenine toqtaldy.
– Armiia Táýelsizdigimizdiń tiregi bolyp, memleket múddelerin qorǵaýy tiis. Qańtar oqiǵasy kezinde Qarýly Kúshter ózine senimsiz ári qabiletsiz basshylyǵynyń kesirinen júktelgen mindetterdi tiisti deńgeide atqara almady. Ministr Bektanov komandirlik qabiletin kórsete almady. Komandalyq-shtabtyq jáne áskeri jattyǵýlar kezinde oń nátije kórsetken armiiamyz bola tura, syn saǵatta onyń áleýetin paidalana almadyq. Syrttan kómek shaqyrýǵa májbúr boldyq, – dedi Joǵarǵy Bas qolbasshy.
Sonymen qatar Prezident Qazaqstandaǵy bitimgerlik missiiasyn aiaqtaǵan UQShU kontingentiniń jumysyna oń baǵa berdi.
– UQShU-nyń bitimgerlik kúshteri Qazaqstanǵa qysqa merzimge ǵana kelip, qorǵaý qyzmetin atqardy. Ujymdyq kontingent ózderiniń tiimdiligin jáne áleýetin kórsetti, – dedi Memleket basshysy.
Prezident geosaiasi jaǵdaidy jáne aimaqtyq deńgeidegi ózekti syn-qaterlerdi eskere otyryp, Qazaqstan Qarýly Kúshteriniń áskeri daiyndyǵyn túbegeili arttyrýdy talap etti. Ol úshin birqatar mindetti oryndaý qajet.
Joǵarǵy Bas qolbasshynyń pikirinshe, eń aldymen, el basshylyǵyn syrtqy jáne ishki qaýip-qaterler týraly ýaqtyly ári naqty aqparattarmen qamtamasyz etýge tiisti áskeri barlaý qyzmetin kúsheitý kerek.
Memleket basshysynyń Jarlyǵyna sáikes qurylatyn Arnaýly operatsiialar jónindegi kúshterdiń Basshylyǵyna mańyzdy missiia júkteledi. Sondai-aq olarǵa qysqa merzim ishinde basqa kúshtik qurylymdarmen birlesip, barlyq uiymdastyrý sharalaryn qabyldap, arnaýly operatsiialardy oryndaýǵa daiyndalý mindeti júkteledi.
Qasym-Jomart Toqaev qarý-jaraq saqtaityn nysandarda tótenshe jaǵdailardyń qaitalanýyna jol bermeý qajettigin eske saldy. Osyǵan bailanysty Prezident qarý-jaraqtardyń saqtalý qaýipsizdigin qamtamasyz etý, paidalanýǵa jaramsyz jáne ári qarai saqtaýǵa qaýipti qarý-jaraqtardy joiý sharalaryn júzege asyrýdy jalǵastyrý kerek ekenin aitty.
Sonymen qatar Memleket basshysy Qazaqstan armiiasynyń tehnikalyq jáne jaýyngerlik jabdyqtaryn jańartý mindetin júktedi.
– Áskerdegi qarý-jaraqtyń deni – 30-50 jyl bolǵan keńes dáýirindegi tehnika. Eskirgen tehnikalardyń merziminiń ótkenine bailanysty qarý-jaraq parkin jańartý úshin shuǵyl sharalar qabyldaý qajet. Qarýly Kúshter zamanaýi ári joǵary tehnologiialyq qarý-jaraqpen, áskeri tehnikamen jabdyqtalýy tiis. Qabyldanatyn sharalar júieli bolýy kerek. Qarý-jaraq pen áskeri tehnikany jóndeitin, olarǵa qyzmet kórsetetin otandyq óndiristi damytý qajet, – dedi Joǵarǵy Bas qolbasshy.
Memleket basshysy áskerdiń shuǵyl áreket etý qabiletin artyryp, áskeri-transporttyq aviatsiianyń áleýetin kúsheitý qajet ekenine toqtaldy. Onyń aitýynsha, áskeri boryshty óteý mindetiniń bedelin kóterip, abyroiyn arttyrý qajet.
Sonymen qatar Qasym-Jomart Toqaev qańtar oqiǵasynyń sabaqtaryn eskere otyryp, Qarý-jaraq jáne áskeri tehnika satyp alý jónindegi 2022 jylǵa arnalǵan jospardy qaita qaraýdy jáne Qarýly Kúshterdegi kadrlyq áleýetti arttyrý sharalaryn qabyldaýdy tapsyrdy.
Budan keiin Rýslan Jaqsylyqov Qazaqstan Respýblikasynyń Qorǵanys ministri retinde ant qabyldady.
Jiyn sońynda Prezident jańa ministrge jáne Qorǵanys ministrliginiń ujymyna sáttilik tiledi.
