Qasym-Jomart Toqaev órtten zardap shekken Áýliekól aýdanyndaǵy aýmaqty aralaǵannan keiin shuǵyl áreket etý shtabynyń otyrysyn ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Tótenshe jaǵdailar ministri Iýrii Ilin men Qostanai oblysynyń ákimi Arhimed Muhambetovtiń órtti aýyzdyqtaý, eldi mekenderdegi azamattardy evakýatsiialaý jáne zardap shekken turǵyndarǵa qoldaý kórsetý jóninde qabyldanǵan sharalar týraly baiandamalaryn tyńdady.
Prezident óńirdegi ahýaldyń baqylaýda ekenin aitty. Tabiǵi apatty joiý úshin barlyq qajetti sharalar qabyldanǵan.
Qasym-Jomart Toqaev bolǵan jaǵdaidan tiisti sabaq alý qajet ekenin atap ótip, órtti tolyq ári jyldam aýyzdyqtaý úshin shuǵyl áreket etý shtabyna barlyq vedomstvonyń úzdiksiz jumysyn qamtamasyz etýge baǵyttalǵan birqatar naqty tapsyrma berdi.
Sonymen qatar, Prezident úilerin tastap ketýge májbúr bolǵan adamdarǵa tolyqqandy qoldaý kórsetýdiń mańyzdy ekenin atap ótti. Úkimet pen Qostanai oblysynyń ákimdigine zardap shekken turǵyndarǵa shuǵyl túrde ótemaqy tóleý máselesin qamtamasyz etý tapsyryldy.
– Zardap shekken azamattardyń bárine qajetti kómek beriledi. Olar qaýipsiz jerge kóshirildi. Meniń tapsyrmam boiynsha Úkimet tiisti máselelerdi sheshý jumystarymen ainalysyp jatyr. Kómek kórsetiletine eshqandai kúmán bolmaýǵa tiis, – dedi Memleket basshysy.
Budan bólek, Qasym-Jomart Toqaev órttiń shyǵý sebebin anyqtaý qajet ekenine nazar aýdardy. Onyń aitýynsha, orman alqabyn qaita qalpyna keltirý úshin keshendi sharalar ázirlep, aldaǵy ýaqytta osyndai apatty jaǵdailardy boldyrmaý jónindegi aldyn alý jumystaryn júrgizý kerek.
Prezident Tótenshe jaǵdailar ministrligin vedomstvo qyzmetkerleriniń áleýmettik, sonyń ishinde turǵyn úige jáne jataqhanaǵa qatysty máselelerin sheshýge jáne qamtamasyz etýge, sondai-aq kásibi kadrlardyń daiyndyq deńgeiin arttyrýǵa qabiletti institýt retinde aitarlyqtai kúsheitý qajet ekenin aitty.
Sonymen qatar Memleket basshysy Tótenshe jaǵdailar, Ishki ister jáne Qorǵanys ministrlikteriniń órt sóndirý bólimsheleriniń jeke quramymen, sondai-aq órtti aýyzdyqtaýǵa tartylǵan eriktilermen kezdesti.
Qasym-Jomart Toqaev tótenshe jaǵdaidy joiýǵa atsalysqan barlyq azamattyń jasaǵan erligi úshin alǵys bildirip, olar nagradalar men syilyqtarǵa usynylatynyn aitty.
