Memleket basshysy Qasym-Jomart Toqaev halyq ártisi Iýrii Pomerantsevtiń týǵan-týystary men jaqyndaryna kóńil aitty. Bul týraly Memleket basshysynyń baspasóz hatshysy Berik Ýáli málimdedi, - dep habarlaidy "Ult aqparat".
"Prezident Qazaqstannyń Eńbek Eri Iýrii Pomerantsevtiń qaitys bolýyna bailanysty onyń jaqyndary men týystaryna kóńil aitý jedelhatyn joldady.
Erekshe talantty akter, kórermenniń kózaiymy bolǵan tulǵa Iýrii Borisovich qazaq teatry men kinosynyń damýyna ólsheýsiz úles qosty. Ol bizge tereń maǵynaly, shynaiy sezimge toly erekshe týyndylardyń tutas shoǵyryn syilady. Iýrii Pomerantsevtiń ómiri men shyǵarmashylyq joly - ónerge degen adaldyq pen riiasyz qyzmettiń, patriotizmniń, parasattylyq pen jomarttyqtyń úlgisi. Iýrii Borisovich halyqtyń súiispenshiligi men qurmetine bólengen tulǵa. Ol jas urpaqtyń dana tálimgeri boldy", - delingen jedelhatta.
