Foto: Akorda.kz
Qasym-Jomart Toqaev YTO Express Co., Ltd kompaniiasynyń basqarma tóraǵasy Iýi Hýeitsziaony qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda elektrondy kommertsiia, kólik jáne logistika salalaryndaǵy ózara tiimdi yntymaqtastyq perspektivalary talqylandy.
Qasym-Jomart Toqaev elimizde Alibaba, Wildberries, OZON jáne JD.com sekildi iri marketpleister jumys istep jatqanyn atap ótti. Qazaqstan 2030 jylǵa qarai elektrondy saýda úlesin jalpy saýda-sattyq naryǵynyń 20 paiyzyna deiin jetkizýdi josparlap otyr.
Áńgimelesý barysynda Prezidentke Qytaidyń tez jetkizýge mamandanǵan eń iri logistikalyq operatorlarynyń biri bizdiń naryqqa kelip, Ortalyq Aziiadaǵy bas keńsesin Qazaqstanda ashýdy kózdep otyrǵany jóninde málimet berildi. Bul ýaǵdalastyq «Qazposhta» aktsionerlik qoǵamy men YTO Express Group arasyndaǵy yntymaqtastyq týraly kelisimge qol qoiý aiasynda bekitiledi.
– Qytaidyń «Bir beldeý, bir jol» bastamasy aiasynda Sizdiń kompaniiańyzben ózara tiimdi yntymaqtastyq ornatý úshin zor múmkindigimiz bar. Búginde elektrondy kommertsiia – ekonomikanyń eń jyldam damyp kele jatqan salalarynyń biri. Álemdik JIÓ-niń shamamen 7 trillion dollar qarjysy osy saladan quralady. Qazaqstan elektrondy kommertsiiany damytýǵa airyqsha mán beredi, – dedi Qasym-Jomart Toqaev.
Iu Hýei Dziao Memleket basshysyna kompaniianyń Qazaqstandaǵy negizgi jobasy týraly baiandady. Atap aitqanda, kásiporyn elimizdiń birqatar óńirinde «A» sanatyna jatatyn joǵarytehnologiialyq mýltimodaldy ortalyqtar salýdy josparlap otyr. Mundai infraqurylym taýardy jedel óńdep, ony Eýropa Odaǵy, Eýraziialyq ekonomikalyq odaq jáne Ortalyq Aziia elderine shyǵarýǵa ońtaily jaǵdai jasaidy. Al intellektýaldy IT-sheshimderdi engizý logistika protsesin tolyqtai avtomattandyrýǵa múmkindik berip, elektrondy kommertsiia taýarlarynyń kedennen jyldam ótýin qamtamasyz etedi.
