Memleket basshysy Volonter jylynyń resmi jabylý rásimine qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev jiynǵa qatysýshylar aldynda sóilegen sózinde Volonter jylynyń tabysty bolǵanyn atap ótti. Onyń aitýynsha, bul jyl bizdiń elimizde ǵana emes, búkil álem tarihynda asa kúrdeli kezeńderdiń biri bolǵanyna qaramastan, «qaiyrymdy ister» jalpy ulttyq ideiasy on myńdaǵan qazaqstandyqtyń qaiyrymdylyǵy men janashyrlyǵynyń arqasynda ómir shyndyǵyna ainaldy. Prezidenttiń pikirinshe, otandastarymyz ult rýhynyń myzǵymas beriktigin, birlik pen yntymaqtyń, tutastyq pen tilektestiktiń, shynaiy yqylas pen bir-birine degen qamqorlyqtyń jarqyn úlgisin kórsetti.
– Eriktiler jyly jalyndy jastarymyzdyń boiyndaǵy eń asyl qasietterdi dáriptegen erekshe jylǵa ainaldy. Bul janashyrlyqqa, jaýapkershilik pen qamqorlyqqa úndegen kezeń boldy. Biz muqtaj jandarǵa qol ushyn berip, túrli qiyndyqtarmen birge kúrestik. Osylaisha, adamgershilik qundylyqtardy joǵary baǵalaityn qoǵam ekenimizdi tanyttyq. Álemdi jailaǵan indet qaiyrym men meiirimniń qanshalyqty mańyzdy ekenin anyq kórsetti. Qaýipti dert el-jurttyń densaýlyǵyn ǵana emes, bekem birligin de synǵa aldy. Biz bir el, bir halyq bolyp bul synǵa tótep berdik, – dedi Prezident.
Jyl boiy 100 myńnan astam adam erikti qyzmet kórsetti. Volonterliktiń jańa baǵyttary da tiimdi dami bastady. Memleket basshysy janashyr azamattary kóp memlekettiń bolashaǵy da jarqyn bolatynyn atap ótti. Eriktiler qyzmeti barsha azamattarymyzǵa úlgi bolyp, ulttyń jańa sapasyn qalyptastyrýǵa jol ashatynyna senim bildirdi.
– «Birgemiz» jalpy ulttyq bastamasy az ǵana ýaqytta kóptegen meiirimdi otandasymyzdy judyryqtai jumyldyrdy. Olar osyndai qiyn kezeńde muqtaj jandarǵa qol ushyn sozdy. Atalǵan bastama aiasynda «Qamqor», «Saulyq», «Sabaqtastyq» jobalary júzege asyrylyp, júz myńdaǵan turǵynǵa kómek kórsetildi. Ózenderdi, ormandardy tazalaý, aǵash egý, qoqysty suryptaý jónindegi «Taza Alem» volonterlik qozǵalysynyń qyzmeti de kópshiliktiń qoldaýyna ie boldy. Búginde ekobelsendilik – sán qýý emes, shynaiy qajettilik, ómir qaǵidaty. Sol arqyly biz tabiǵatymyzdy saqtai alamyz, – dedi Qasym-Jomart Toqaev.
Prezident memlekettik organdar, arhiv uiymdary, ǵylymi institýttar eriktilerdiń resýrsyn paidalanýy qajet dep sanaidy. Onyń aitýynsha, Arys pen Maqtaaraldaǵy qaiǵyly oqiǵalardy eskere otyryp, kúrdeli tehnogendi apattardan keiingi qutqarý jumystaryn júrgizý úshin eriktiler daiyndaityn arnaiy oqytý kýrstaryn ashý qajettigi týyndap otyr. Tabiǵatty jáne jan-janýarlardy qorǵaý máselesi de erekshe nazar aýdarýdy qajet etedi. Sondai-aq qaiyrymdylyq qyzmetine júieli túrde qoldaý kórsetý máselesine de basymdyq bergen jón. Prezidenttiń tapsyrmasy boiynsha qaiyrymdylyq salasyndaǵy kemshilikterdi joiýǵa múmkindik beretin Qaiyrymdylyq týraly zań jobasy ázirlenýde.
– Áleýmettik baǵyttaǵy qyzmetti yntalandyrý jáne ony qoldaýdyń barshaǵa túsinikti ári tiimdi quqyqtyq tetikteri qajet. Bul úshin Úkimet atqarylatyn mindetterdi pysyqtaýy tiis. Qaiyrymdylyq uiymdaryn alǵashqy ashylǵan jyldary jáne odan keiingi ýaqytta damytý úshin olardyń jeńildetilgen nesie alýyna, memleket menshigindegi nysandardy jeńildikpen paidalanýyna múmkindikter jasaý kerek. Biznes pen jeke tulǵalardyń qaiyrymdylyq jáne volonterlik jobalarǵa qatysýyn janama yntalandyrý úshin onyń tiimdi tetikterin, sonyń ishinde, memlekettik qoldaý kórsetý sharalary kezinde olarǵa quqyqtyq basymdyq berý mańyzdy. Qaiyrymdylyq jáne volonterlik uiymdarǵa memleket tarapynan da, biznes tarapynan da kórsetiletin qarjylai jáne basqa da kómekterdiń aiasyn keńeitý kerek. Úkimetke tiisti usynystar ázirleýdi tapsyramyn, – dedi Memleket basshysy.
Qasym-Jomart Toqaev qaiyrymdylyq qyzmetiniń ashyqtyǵyn qamtamasyz etý maqsatynda Qaiyrymdylyq uiymdarynyń reestrin engizý máselesin oilastyrýdy tapsyrdy. Bul tizbe osy saladaǵy barlyq aqparattyq júiege engizilip, qaiyrymdylyq uiymdarynyń qyzmetimen, olardyń qarjylyq esebimen tanysqysy keletin kez kelgen azamatqa qoljetimdi bolýy tiis. Elektrondy qaiyrymdylyq salasynda azamattardy alaiaqtardan qorǵaý júiesin ázirleý de mańyzdy.
– Búginde bul – qarjylai kómek aýdarýdyń tanymal túri. Qazaqstannyń árbir úshinshi azamaty onlain sadaqa berýdi jón kóredi. Alaiaqtyqqa jol bermei, azamattardyń senimine kóleńke túsirmeý úshin onlain-bankingter arqyly sadaqa berý qyzmetin jedel paidalaný tetigin engizý qajet. Bul qarajattyń túsýin jáne jumsalýyn baqylaýǵa múmkindik beredi, – dedi Prezident.
Memleket basshysy volonterlik uiymdardy qoldaý jáne olarǵa arnaiy granttar bólý jumysyn jalǵastyrý qajettigin atap ótti. Qaiyrymdylyq isterdi jalǵastyrý úshin eriktilikti damytýdyń jol kartasyn jáne olardy daiarlaýǵa arnalǵan baǵdarlama ázirleý kerek. Úkimetke volonterlik qyzmetti qoldaýdyń biryńǵai standartyn jasaý tapsyryldy.
– Volonterlik – bul jai ǵana áleýmettik qubylys emes. Tipti, bir kúnde qalyptasatyn ádet nemese daǵdy deýge de bolmaidy. Bul – kóptegen adamdardyń sanaly túrde tańdaǵan ómir salty. Qaiyrymdylyq – adamnyń bala kezinen boiǵa sińetin qasiet. Sondyqtan, óskeleń urpaqty jastaiynan jaqsylyq jasaýǵa tárbieleý – óte mańyzdy mindet. Osy rette, barlyq bilim berý mekemelerinde taqyryptyq sabaqtar men fakýltativtik saǵattar engizýdi usynamyn. Qoǵamǵa qyzmet etýdi zerdesine túigen ul-qyzdarymyz naǵyz azamat bolary anyq. Dana Abai aitqan «Ystyq qairat, nurly aqyl, jyly júrek» dál qazirgi kezeńde aýadai qajet. Bul asyl qasietter volonter qataryna qosylamyn degen árbir jastyń boiynan tabylady, – dedi Qasym-Jomart Toqaev.
Memleket basshysynyń sózinde volonterlik jáne qaiyrymdylyq qyzmetterdiń, sondai-aq, korporativtik volonterlikti damytý aiasynda áleýmettik seriktestiktiń áleýetin arttyrýǵa basa mán berildi.
Qazaqstan álemniń ártúrli elderindegi muqtaj jandarǵa kómek qolyn sozý arqyly Birikken Ulttar Uiymynyń Eriktiler baǵdarlamasyn júzege asyrýǵa belsendi atsalysqan elderdiń biri boldy. Qasym-Jomart Toqaev BUU Bas Assambleiasynyń 75-sessiiasynda Volonterlerdi jumyldyrýdyń halyqaralyq jylyn jariialaý jóninde usynys aitty. Bul bastama Qazaqstannyń volonterlik dástúr men mádenietti elimizde ǵana emes, sondai-aq, búkil álemde damytýǵa nietti ekenin bildiredi.
– Endi sanaýly kúnnen soń biz Táýelsizdiktiń 30 jyldyǵyna qadam basamyz. Bul – el damýyndaǵy asa mańyzdy beles, tarihi meje. Sondai-aq jetistigimizdi saralap, bolashaǵymyzdy baǵamdaityn kezeń. Keler jylǵy mereitoilyq is-sharalardyń mazmunyna erekshe mán beremiz. Onyń árqaisysy tereń maǵynaly jáne qoǵam úshin paidaly bolýǵa tiis. Sonymen qatar óskeleń urpaqqa tálim-tárbie berýi shart. Osyǵan orai jalpyulttyq deńgeide «Qaiyrymdy ister» marafonyn uiymdastyrýdy usynamyn. Bul – bereke-birligimizdi arttyratyn mańyzdy bastama. Qazirgidei kúrdeli kezeńde jaqsy ister jasaýǵa mán bergenimiz eldigimizdi nyǵaita túsetini anyq. Bul úshin ult bolyp uiysýdyń mańyzy zor, – dedi Memleket basshysy.
Qazaqstan Prezidenti pandemiianyń qiyn-qystaý kezinde beitarap qalmai, halyqqa kómektesip júrgen, sondai-aq, volonterlerdiń birqatar usynysy men bastamasyna qoldaý kórsetken azamattarǵa alǵys bildirdi.
Is-shara barysynda «Ulttyq Volonterlik jeli» zańdy tulǵalar birlestiginiń tóraiymy Vera Kim, Arys qalasynyń eriktisi Oljas Mamyr, BUU Eriktiler baǵdarlamasynyń úilestirýshisi mindetin atqarýshy Toili Kýrbanov, Temirtaý qalasy Ardagerler keńesiniń tóraǵasy Berlikbai Ordabaev, «Qoǵamdyq baqylaý» tobynyń respýblika boiynsha úilestirýshisi Saida Táýekeleva, Resei Volonterlik bastamalar assotsiatsiiasy ortalyǵynyń tóraǵasy Artem Metelev, «Sanaly urpaq» jobalyq keńsesiniń ofitseri Bogdan Petrov, «INUCOBO» jan-janýarlardy qorǵaý uiymynyń prezidenti Liliia Sársenova, BUU Eriktileriniń halyqaralyq volonteri Ainur Qanafina, «Shag navstrechý» shtabynyń eriktisi Maksim Panchenko, «AVK» Atyraýlyq eriktiler korpýsynyń basshysy Bekasyl Samiǵolla, «Jas Ulan» biryńǵai balalar men jasóspirimder uiymynyń tóraiymy Dinara Sádýaqasova sóz sóiledi.
