Foto: Akorda.kz
Qasym-Jomart Toqaev Vatikanda Rim Papasy Frantsiskpen kezdesti, - dep habarlaidy "Ult aqparat" Aqordanyń resmi saityna silteme jasap.
Memleket basshysy Rim Papasynyń shaqyrýymen Qasietti Taqqa alǵashqy resmi saparyn jasady.
Qazaqstan Prezidenti sóziniń basynda álemdegi adamzattyń igiligi jolyndaǵy qajymas qairaty men qajyrly kúsh-jigeri úshin Katolik shirkeýiniń Joǵarǵy Pontifikine rizashylyǵyn bildirdi.
– Sizdiń dúniejúzi halqyna beibitshilik tilegen duǵalaryńyz myńdaǵan katoliktiń ǵana emes, basqa dinderdi ustanatyn kóptegen otandastarymyzdyń júreginen oryn alyp, sanalaryna senim men úmit uialatty. Búginde órkenietter toǵysynda ornalasqan kópultty jáne kópkonfessiialy Qazaqstan Ortalyq Aziiadaǵy eń iri katolik qaýymynyń óz úiine ainaldy, – dedi Prezident.
Memleket basshysynyń aitýynsha, barlyq dinderdiń ókilderi Ádiletti Qazaqstandy qurýǵa eleýli úles qosýda.
– Biz «birligimiz áralýandyqta» qaǵidatyna negizdelgen beibitshilik pen ulttyq dialogtyń ózimizge tán modelin qalyptastyra aldyq. Elimizde túrli dinniń ókilderi ózderiniń ǵibadathanalarynda qulshylyq ete alady. Dini senim bostandyǵy quqyǵyn qorǵaý – meniń saiasi baǵdarymnyń ajyramas bóligi, – dedi Qasym-Jomart Toqaev.
Qazaqstan Prezidenti Rim Papasy Frantsisktiń «Qalaǵa jáne álemge» atty dástúrli Joldaýyn eske sala otyryp, onyń «Beibitshilik – eń aldymen Qudaidyń syiy. Biraq bul – bárimizge júktelgen úlken jaýapkershilik» degen sózderin tolyq qoldaitynyn jetkizdi.
– Sizdiń ustanymyńyzdy tolyǵymen quptai otyryp, biz kóptegen aiyrmashylyqtarymyzǵa qaramastan, beibitshilik ideialaryn, mádenietter men dinder arasyndaǵy turaqty dialogty, ártúrli dindi ustanatyn adamdardyń igiligi jolyndaǵy damýdy ilgeriletý úshin barshamyzǵa birlik kerek ekenine senimdimin. Izgi niet bildirýge ýaqyt jetkilikti, kelissózder júrgizýge keńistik te bar, danalyq tanytýǵa áli de múmkindik mol, – dedi Memleket basshysy.
Qasym-Jomart Toqaev ekijaqty qatynastar aiasynda Qazaqstan shynaiy dostyqqa, kelisim men ózara qurmetke negizdelgen Qasietti Taqpen aradaǵy burynnan kele jatqan seriktestik bailanystardy joǵary baǵalaitynyn atap ótti. Sondai-aq belsendi saiasi dialog júrgizilip otyrǵanyn, quqyqtyq bazany retke keltirý, keńeitý úshin dáiekti jumystar atqarylyp jatqanyn jetkizdi.
Qazaqstan Prezidenti álemdegi teketirester men alaýyzdyq oshaqtaryn toqtatýǵa baǵyttalǵan belsendi kúsh-jigeri úshin Rim Papasy Frantsiskke rizashylyǵyn bildirdi.
– Shyn máninde, qazirgi geosaiasi turaqsyzdyq búkil jahandyq qaýipsizdik arhitektýrasyna nuqsan keltirýde, sondai-aq halyqtardy úlken qaiǵy-qasiretke ushyratyp, ekonomikalyq qiyndyqtar týdyryp otyr. Qazaqstan izgilikti jaqtaityn memleket retinde jahandyq beibitshilik pen qaýipsizdikti qoldaýǵa is júzinde eleýli úles qosýda. Biz álemniń túrli qaqtyǵys oshaqtaryndaǵy BUU-nyń bitimgershilik missiialaryna atsalysamyz, – dedi Qasym-Jomart Toqaev.
Óz kezeginde Pontifik beibitshilik pen kelisimdi qamtamasyz etý isindegi kúsh-jigeri úshin Qazaqstan Prezidentine alǵys aitty.
Kezdesý sońynda Memleket basshysy mazmundy kezdesý úshin Rim Papasyna alǵys aityp, Qazaqstan aldaǵy ýaqytta toleranttylyq, úilesimdilik, baýyrlastyq ideialaryn dáripteý isinde Qasietti Taqpen yntymaqtastyq jasaýǵa nietti ekenin rastady.
