Májilis spikeri Erlan Qoshanov Konstitýtsiiada "jer jáne onyń qoinaýy halyqqa tiesili" degen norma bekitilse, qazaqstandyqtar arabtar siiaqty munaidyń igiligin kóre ala ma degen suraqqa jaýap berdi, dep habarlaidy Sputnik Qazaqstan.
Buǵan deiin prezident jerdiń jáne tabiǵi resýrstardyń iesi halyq degen normany Konstitýtsiiada birjola bekitýdi usynǵan bolatyn.
"Meniń oiymsha, bul norma – ádil jáne durys. Sebebi jerdiń de, sýdyń da, jerdiń ústindegi de, astyndaǵy da bailyqtyń iesi halyq bolýy kerek. Sondyqtan prezidenttiń usynysymen osy norma engizildi. Mysaly, ken oryndaryn alaiyq. Olardy igeretin kompaniialar men investorlardyń tólegen salyǵy, ashqan jumys oryndary arqyly biýdjetke qarajat túsedi. Al biýdjetke túsken aqshanyń kómegimen áleýmettik máseleler sheshimin tabady. Sol sebepti "halyqqa tiesili" degendi durys túsiný kerek", - dedi Qoshanov májilis kýlýarynda jýrnalister suraǵyna jaýap berip.
Onyń aitýynsha, Konstitýtsiiaǵa engiziletin ózgeris ken oryndaryn kompaniialardan nemese investorlardan tartyp alý degendi bildirmeidi.
"Eger olar zańdy buzbasa, jumysyn ári qarai jalǵastyra beredi. Biraq zańdy buzsa, onda onymen basqa organdar ainalysady", - dep túsindirdi spiker.
