Qasym-Jomart Toqaev «BUU – áielder» qurylymynyń Frantsiia jáne Meksika úkimetterimen birlesip uiymdastyrǵan «Urpaq teńdigi» atty jahandyq forým qatysýshylaryna beine úndeý jasady.
Bul týraly Aqordanyń resmi saity habarlady.
Virtýaldy formatta ótken jiyn genderlik teńdik salasyndaǵy jahandyq kúsh-jigerdi úilestirýge arnalǵan. Forýmnyń negizgi maqsaty – osy protseske tartylǵan barlyq qatysýshynyń naqty mindettemelerine negizdelgen kópjaqty mehanizm qalyptastyrý.
Memleket basshysy óz sózinde Qazaqstan Táýelsizdik alǵannan bastap 30 jyl boiy áielderdi qoldaýǵa baǵyttalǵan saliqaly saiasatty dáiekti túrde júrgizip kele jatqanyn atap ótti.
– 2030 jylǵa deiingi otbasy jáne genderlik saiasat tujyrymdamasyn basty negizge alǵan berik quqyqtyq baza qalyptastyrdyq. Ótken aida adam quqyǵyna qatysty aldaǵy ýaqytta atqarylatyn sharalar týraly Jarlyqqa qol qoidym. Onyń negizgi baǵyttarynyń biri – genderlik teńdikti qamtamasyz etý. Genderlik máseleni sheshý – óńirlik ólshem boiynsha elimizdiń syrtqy saiasattaǵy basymdyqtarynyń biri, – dedi Qasym-Jomart Toqaev.
Sonymen qatar Prezident Qazaqstannyń «Genderlik zorlyq-zombylyqqa qarsy is-qimyl koalitsiiasy» jáne «Ekonomikalyq ádildik pen quqyq jónindegi is-qimyl koalitsiiasy» siiaqty eki seriktes birlestikke qosylatynyn málimdedi. Bul memlekettiń birqatar mindetteme qabyldaǵanyn bildiredi.
Atap aitqanda áielder men qyzdarǵa qatysty zorlyq-zombylyqtyń taralýy týraly jalpyulttyq zertteý jumysyn qolǵa alý jóninde sheshimin aitty.
Memleket basshysy genderlik teńdik jáne zorlyq-zombylyqtyń aldyn alý boiynsha ozyq tájiribemen bólisý úshin Ortalyq Aziiada óńirlik bilim platformasyn qurý týraly bastama kóterdi.
Qasym-Jomart Toqaev BUU men Eýropalyq odaqtyń Ortalyq Aziia men Aýǵanstanǵa arnalǵan «Jaryq sáýlesi» óńirlik bastamasyna investitsiia salýǵa daiyn ekenin atap ótti.
Budan bólek Prezident áiel kásipkerlerdi qoldaý úshin elimizdiń barlyq óńirinde resýrstyq ortalyqtar qurý jospary týraly málimet berdi.
Memleket basshysy zańnamalyq deńgeide qabyldanyp jatqan sharalar týraly aita kelip, áielder úshin tyiym salynǵan mamandyqtar tizimin qaita qaraýǵa, sondai-aq, áielder men balalardy áleýmettik jáne quqyqtyq turǵydan qoldaýdy kúsheitýge nietti ekenin jetkizdi.
Qasym-Jomart Toqaev sóziniń sońynda áielderdiń teńdigi men qaýipsizdigin qorǵaýǵa, olardyń quqyqtary men múmkindikterin keńeitýge baǵyttalǵan igi isti elimizdiń tolyq qoldaitynyn naqtylady.
