Prezident Qasym-Jomart Toqaev Ulttyq bank tóraǵasy Ǵalymjan Pirmatovty qabyldady, dep habarlaidy Aqorda.
Memleket basshysyna Ulttyq banktiń 2022 jylǵy 1-toqsanda júzege asyrǵan aqsha-kredit saiasatynyń aldyn ala qorytyndylary jóninde, sondai-aq qarjy jáne baǵa turaqtylyǵyn qamtamasyz etý úshin qabyldanyp jatqan sharalar týraly esep berildi.
Prezidentke syrtqy jáne ishki naryqtardaǵy ahýal jaiynda baiandaldy. Ǵalymjan Pirmatov valiýta naryǵynda qalyptasqan úrdister, Ulttyq banktiń altyn-valiýta rezervteri men Ulttyq qordaǵy aktivterdiń jai-kúii týraly aitty.
Sonymen qatar Qasym-Jomart Toqaevqa infliatsiianyń qarqyny, bank júiesindegi depozitter qurylymynyń ózgerýi, zeinetaqy aktivteriniń jaǵdaiy men tólem júiesiniń damýy jóninde málimet berildi.
Kezdesý sońynda Memleket basshysy birqatar naqty tapsyrma berdi.
