Foto: Aqordanyń baspasóz qyzmeti
Memleket basshysy «Rodina» agrofirmasynyń bas direktory Ivan Saýerdi qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda aýyl sharýashylyǵy salasyn damytý máseleleri talqylandy.
Ivan Saýer Qasym-Jomart Toqaevqa otandyq aýyl sharýashylyǵy ǵylymyn keshendi túrde jańǵyrtý týraly usynystaryn aitty. Sondai-aq elimizdiń aýyldyq aýmaqtaryn damytýǵa qatysty óziniń kózqarasyn jetkizdi.
Memleket basshysy damyǵan infraqurylymymen jáne turǵyndardy barynsha jumyspen qamtýymen erekshelenetin «Rodina» aýyly úlgili eldi meken sanalatynyn atap ótti.
Prezident memleket tarapynan aýyl turǵyndarynyń tabysy men turmys sapasyn arttyrýǵa airyqsha kóńil bólinetinine toqtaldy.
Qasym-Jomart Toqaev aýyl halqynyń eńbek ónimdiligi men jumyspen qamtý kórsetkishterin arttyrýǵa, sondai-aq aýyldaǵy áleýmettik infraqurylymdy damytýǵa baǵyttalǵan memlekettik baǵdarlamalardy tiimdi júzege asyrý úshin biznes-qoǵamdastyqpen birlese áreket etý qajet ekenine nazar aýdardy.
