Úkimet densaýlyq saqtaý salasy qyzmetkerleriniń materialdyq jaǵdaiyn jaqsartý boiynsha tiisti sharalar qabyldaýy qajet. Bul týraly QR Parlamenti Senatynyń tóraǵasy Qasym-Jomart Toqaev málim etti, dep habarlaidy QazAqparat.
«Ýaqtyly meditsinalyq kómek kórsetý, onyń qoljetimdiligi men sapasyn qamtamasyz etý - bul salanyń basty mindeti. Elbasy qańtar aiyndaǵy Joldaýynda osy salanyń aldyndaǵy birqatar naqty mindetterdi anyqtaǵan bolatyn. Soǵan sáikes, naýqastardy emdeýde qymbatqa túsetin statsionarlyq emge qaraǵanda, negizinen aýrýdyń aldyn alýǵa baǵyttalǵan sharalarǵa basymdylyq berýdiń, aýrýdy ýaqtyly anyqtaý men emdeýdi qamtamasyz etetin jańa tehnologiialardy engizýdiń mańyzy zor. Sonymen qatar, tegin meditsinalyq kómektiń jańa modelin ázirleý, meditsina mamandarynyń sapasyn kóterý jáne densaýlyq saqtaý júiesin tsifrlandyrý kezek kúttirmeitin máselelerdiń qatarynda. Elimizde densaýlyq saqtaý máselelerine únemi erekshe mán berilip keledi. Jetkilikti zańnamalyq baza qalyptastyrylyp, salany qarjylandyrý aitarlyqtai arttyrylýda. Osyndai saiasattyń nátijesinde, jalpy bul salada ilgerileý bar. Atap aitqanda, halyqtyń tabiǵi ósýi artyp, ana men bala ólimi azaidy. Birqatar áleýmettik mańyzy bar aýrýlar boiynsha syrqattaný deńgeii tómendedi», - dedi Toqaev Senattaǵy «Úzdik densaýlyq saqtaý isi - deni saý ult» taqyrybyndaǵy parlamenttik tyńdaýda.
Onyń sózine qaraǵanda salada aitarlyqtai eleýli tabysqa qol jetikizilgenimen, áli kúnge deiin sheshimin tappaǵan birqatar máseleler bar.
«Olar eń aldymen, meditsinalyq qyzmettiń qoljetimdiligi men tiimdiligine bailanysty. Meditsina mamandaryn daiarlaýdyń sapasy men olardy tiisti jumys jaǵdaiymen qatamasyz etý asa mańyzdy másele bolyp otyr. Meditsina qyzmetkerleriniń eńbekaqylaryn arttyrý jáne yntalandyrýdyń tiimdi júiesin qalyptastyrý - kún tártibindegi mańyzdy mindetterdiń biri. Úkimet densaýlyq saqtaý salasy qyzmetkerleriniń materialdyq jaǵdaiyn jaqsartý boiynsha tiisti sharalar qabyldaýy qajet. Memleket basshysynyń jýyrdaǵy úndeýinde aitylǵan aýqymdy áleýmettik jobalardy ońtaily júzege asyrý - azamattardyń, sonyń ishinde meditsina qyzmetkerleriniń de turmys jaǵdaiyn jaqsartary anyq», - dedi ol.
Q. Toqaevtyń atap ótýinshe, elimizde meditsinalyq joǵary oqý oryndary jyl saiyn 4 myńnan astam mamandardy daiarlaitynyna qaramastan, osy salada, ásirese aýyldyq jerlerde baiqalyp otyrǵan maman tapshylyǵy alańdatady.
«Olardyń kásibi daiyndyǵynyń sapasy da suraq týdyrýda. Keibir jekelegen saraptama nátijesine sáikes, meditsinalyq joǵary oqý oryndaryn bitirýshi túlekterdiń árbir tórtinshisi ǵana tańdaǵan mamandyǵy boiynsha qyzmet etýde. Meditsinalyq joǵary oqý oryndaryna qabyldanatyn stýdentterdiń sanyna emes, olardy daiyndaýdyń sapasyna kóbirek kóńil bólgen jón», - dedi Senat tóraǵasy.
.jpeg)