Memleket basshysy Qasym-Jomart Toqaev álemde qubylmaly jaǵdai qalyptassa da, túrkitildes memleketteri yntymaqtastyǵynyń óte mańyzdy ekenin atap ótti, dep habarlaidy Aqordanyń baspasóz qyzmeti.
– Álemdegi qubylmaly jaǵdaidy eshkim dóp basyp boljai almai otyr. Osyǵan qaramastan, bizdiń elderimiz arasyndaǵy qarym-qatynastar oidaǵydai damyp keledi. Qazaqstan men Túrkiia arasyndaǵy qatynastar ózara senimge, dostyqqa negizdelgen, – dedi Qazaqstan Prezidenti.
Qasym-Jomart Toqaev Túrkiianyń halyqaralyq arenadaǵy bedeliniń artyp kele jatqanyna toqtalyp, baýyrlas eldiń jetistigine qýanatynyn jetkizdi. Sonymen qatar Memleket basshysy eki el arasyndaǵy yntymaqtastyqtyń bolashaǵyn joǵary baǵalady.
Mustafa Shentop Qazaqstanǵa jasaǵan sapary aiasynda qabyldaǵany úshin Qasym-Jomart Toqaevqa alǵys bildirip, Túrkiia Prezidenti Rejep Taiip Erdoǵannyń sálemin jetkizdi. Sondai-aq ol álemdik pandemiiaǵa bailanysty betpe-bet kezdesýlerdiń shektelgenine qaramastan, eki eldiń qarym-qatynasy joǵary deńgeide ekenin atap ótti.
– Qarasha aiynda bizdiń elde ótetin Túrki keńesi elderiniń sammitinde túrki áleminiń birligi men yntymaqtastyǵyn odan ári keńeitý jóninde birqatar mańyzdy sheshim qabyldanady degen úmittemiz. Ózińizdi sol sammitte kútemiz, – dedi Túrkiia Uly ulttyq jinalysynyń tóraǵasy.
