Qasym-Jomart Toqaev pen Gýrbangýly Berdimuhamedov Ashhabadtaǵy Abai eskertkishin saltanatty túrde ashty. Bul týraly Ult.kz Aqordaǵa silteme jasap habarlaidy.
Qazaqstan grezidenti men Túrikmenstan Halk Maslahatynyń tóraǵasy Ashhabad tórinde ultymyzdyń uly oishyly Abai Qunanbaiulyna arnalǵan eskertkishtiń ashylý rásimine qatysty.
Eń aldymen, Qasym-Jomart Toqaev Gýrbangýly Berdimuhamedov pen túrikmen halqyna Maqtymquly Pyraǵynyń 300 jyldyq mereitoiyna orai arnaiy shyǵarylǵan medalmen marapattaǵany úshin alǵys aitty. Sonymen qatar muny eki el arasyndaǵy ózara syi-qurmet pen dostyqtyń belgisi retinde qabyldaitynyn jetkizdi.
Memleket basshysy saltanatty jiynda sóilegen sózinde bul eskertkishtiń ashylýyn túrikmen baýyrlardyń qazaq halqyna airyqsha qurmetiniń kórinisi dep sanaitynyn atap ótti.
"Abai – álemdik aýqymdaǵy alyp tulǵa. Onyń shyǵarmalary búkil adamzattyń asyl murasyna ainaldy. Jer júzindegi kóptegen qalada hakim Abaidyń eskertkishi bar. Uly aqyn sanaly ǵumyryn aǵartý isine arnady. Abai «Talap qyl artyq bilýge» dep, óner-bilim filosofiiasyn keńinen nasihattady. Ol teńdessiz týyndylary arqyly myzǵymas qundylyqtardy dáriptedi. Jurtty otanshyldyqqa, bilimpazdyqqa, eńbekqorlyqqa baýlydy. Jaqsylyq pen parasattylyqqa úndedi. Ashhabadta Abai eskertkishiniń ashylýy – baýyrlastyǵymyzdy nyǵaita túsetin biregei bastama", – dedi Qasym-Jomart Toqaev.
Prezident biyl Astanada túrikmen halqynyń uly oishyly Maqtymquly Pyraǵynyń eskertkishi ashylǵanyn eske salyp, qazaq eli túrki jurtyna ortaq tulǵanyń shyǵarmashylyǵyna zor qurmetpen qaraitynyn jetkizdi.
"Shyn máninde, Abai men Maqtymquly eńbekteri – túrki dúniesiniń qundy qazynasy. Ony saqtap, keiingi urpaqqa qaldyrý – barshamyzǵa ortaq mindet. Uly aqyndarymyzdyń poeziiasynda ózara sabaqtastyq mysaldary kóp. Biz – túbi bir, tarihy ortaq, tili men mádenieti uqsas halyqtarmyz. Osy baýyrlastyq elderimizdiń qarym-qatynasyna arqaý bolyp otyr. Qazir bul bailanys strategiialyq seriktestik rýhynda damyp kele jatyr. Túrikmenstanǵa búgingi resmi saparym – sonyń aiqyn dáleli. Abaidyń eskertkishi qazaq-túrikmen dostyǵynyń simvolyna ainalady dep senemin", – dedi prezident.
Túrikmenstan Halk Maslahatynyń tóraǵasy baýyrlas halyqtardyń tarihi jáne mádeni ómirinde jarqyn iz qaldyrǵan belgili tulǵalar, oishyldar men aqyndar murasyn saqtaýdyń jáne ony bolashaq urpaqqa jetkizýdiń máni zor ekenine toqtaldy.
"Búgin biz astanamyz Ashhabadtyń tamasha múiisinde ornalasqan ǵajap saiabaqta baýyrlas qazaq halqynyń uly aqyny, kórnekti mádeniet jáne óner qairatkeri Abai Qunanbaiulynyń eskertkishin ashý rásiminde bas qosyp otyrmyz. Barshańyzdy osy saltanatty sátpen shyn júrekten quttyqtaimyn! Túrikmen jáne qazaq halyqtary álemniń mádeni-rýhani qazynasyna úlken úles qosty. Soǵan sáikes, bul mádeni murany tyńǵylyqty zertteý, ony keńinen nasihattaý jáne osy saladaǵy halyqaralyq áriptestikti damytý asa mańyzdy mindet bolyp sanalady", – dedi Gýrbangýly Berdimuhamedov.
TOQAEV PEN BERDIMUHAMEDOVTIŃ KEZDESÝI
Prezident Qasym-Jomart Toqaevtyń Túrikmenstanǵa resmi sapary Túrikmenstan Halk Maslahatynyń tóraǵasy Gýrbangýly Berdimuhamedovpen kezdesýden bastaldy.
Memleket basshysy qonaqjailyq tanytqany úshin Halk Maslahatynyń tóraǵasyna rizashylyq bildirdi. Sondai-aq Gýrbangýly Berdimuhamedovtiń Qazaqstan men Túrikmenstan arasyndaǵy qarym-qatynasty nyǵaitýǵa zor úles qosqanyn atap ótti.
Prezident qazaq-túrikmen yntymaqtastyǵy dostyq, tatý kórshilik jáne ózara qoldaý rýhynda qarqyndy damyp kele jatqanyna erekshe nazar aýdaryp, Túrikmenstanǵa resmi saparynyń maqsaty eki eldiń strategiialyq seriktestigin jańa deńgeige shyǵarý ekenin aitty.
"Sizdiń elińizben yntymaqtastyqty damytý máselesine zor jaýapkershilikpen qaraimyz. Biz – strategiialyq seriktes eldermiz. Jańa Birlesken úkimetaralyq komissiianyń jumysy týraly aityp óttińiz. Men de onyń qyzmetin baqylap, Úkimetke baǵyt-baǵdar berip, qandai sheshim qabyldaý kerek ekenin nusqap otyramyn. Óitkeni biz úshin Túrikmenstanmen dostyq bailanys basty basymdyqtardyń biri sanalady", – dedi Qasym-Jomart Toqaev.
