Qasym-Jomart Toqaevtyń Túrikmenstanǵa jumys sapary Prezident Gýrbangýly Berdimuhamedovpen Túrikmenbashy qalasyndaǵy «Avaza» ulttyq týristik aimaǵyndaǵy kezdesýden bastaldy, dep habarlaidy Aqorda.
Qazaqstan Prezidenti Túrikmenstan basshysyna qonaqjailyǵy úshin rizashylyq bildirip, Ortalyq Aziia memleketteri basshylarynyń úshinshi Konsýltativtik kezdesýin ótkizý ózekti ári ýaqytyly bastama ekenin atap ótti.
– Siz uiymdastyrǵan keshegi is-shara tanymdy, bir jaǵynan mazmuny da mańyzdy boldy. Is júzinde, keshe biz beiresmi kezdesýde osyndai kúrdeli kezeńde jumylyp, yntymaqtastyqty odan ári kúsheitý ári jańa múmkindikterge jol ashý maqsatynda Ortalyq Aziiadaǵy ózekti máselelerdi talqyladyq, – dedi Qasym-Jomart Toqaev.
Memleket basshylary ekijaqty kún tártibindegi birqatar máselelerdi qarastyryp, Qazaqstan men Túrikmenstan arasyndaǵy qarym-qatynas deńgeiin joǵary baǵalady.
– Túrikmenstan – Qazaqstannyń strategiialyq áriptesi. Uzaqmerzimdi ári strategiialyq sipattaǵy ortaq jobalarymyz kóp. Budan keiingi kelissózder barysynda da ekijaqty yntymaqtastyqty odan ári nyǵaitýǵa mindetti túrde basa mán beremiz. Úkimetke tiisti tapsyrma berdim. Túrikmenstanǵa resmi saparym boiynsha jumys istep jatyr. Jalpy, qol qoiylatyn negizgi qujattar toptamasy ázir. Aldaǵy ýaqytta qol qoiylatyn kelissózder men kelisimder baýyrlas elderimiz arasyndaǵy yntymaqtastyqty odan ári nyǵaitýǵa tyń serpin beretinine senimdimin, – dedi Memleket basshysy.
Taraptar saýda-ekonomikalyq yntymaqtastyqty damytýǵa, jetkiziletin taýarlar túrin arttyrýǵa, kólik-tranzittik áleýetti keńirek paidalanýǵa jáne mádeni-gýmanitarlyq saladaǵy bailanystardy kúsheitýge nietti ekenderin jetkizdi.
