Memleket basshysyna qazirgi qalyptasqan epidemiologiialyq jaǵdai, áleýmettik máseleler, Jer komissiiasy jumysynyń qorytyndylary týraly baiandaldy, dep habarlaidy Aqorda.
Eraly Toǵjanov Prezidentke elimizdegi epidemiologiialyq ahýaldy turaqtandyrý jóninde aitty. Biylǵy 1 mamyrdan bastap koronavirýs indetin juqtyrǵandardyń sany 0,9 paiyzdan 0,49 paiyzǵa tómendegen. Aýrýhanaǵa túsken adamdar 41 paiyzdan 34 paiyzǵa azaiǵan.
Sonymen qatar elimizge COVID-19 indetine qarsy vaktsinanyń 2,3 million dozasy jetkizilgeni aityldy.
Mamyr aiynyń sońyna deiin qosymsha 2 million doza ekpe jetkizý josparlanýda. Shilde aiynan bastap otandyq «QazVac» vaktsinasyn óndirý 500 myń dozaǵa deiin ulǵaiady.
Premer-Ministrdiń orynbasary Memleket basshysyna «Ashyq» jobasynyń engizilýi jaiynda málimet berdi. Búginde 1,5 million qazaqstandyq atalǵan qosymshany belsendi paidalanýda.
Al jobaǵa 7 myńǵa jýyq shaǵyn jáne orta biznes sýbektileri tirkelgen. «Ashyq» jobasynyń engizilýi kásipkerlerdiń úzdiksiz jumys isteýine múmkindik berdi.
Sondai-aq indet juqtyrǵan 2,5 myńnan astam adam jáne dertke shaldyqqan naýqastarmen bailanysta bolǵan 2 myń azamattyń karantin rejimin buzǵany anyqtalǵan.
Prezident bul baǵytta atqarylǵan jumysqa oń baǵa berdi.
Eraly Toǵjanov Memleket basshysyna farmatsevtika ónerkásibin, ǵylymdy damytýǵa, Salaýatty ómir saltyn saqtaý tujyrymdamasy men Áleýmettik kodeksti ázirleýge, jumyssyzdyqtyń aldyn alýǵa qatysty qolǵa alynǵan sharalar týraly aitty.
Qasym-Jomart Toqaev buǵan deiin Túrkistan oblysynyń Baǵys jáne Hiiabon aýyldaryndaǵy jaǵdaidy retteýge qatysty Úkimetke tapsyrma bergen bolatyn.
Soǵan sáikes, eldi mekenderge resmi mártebe berilip, shekaralary naqtylanyp, turǵyndardyń jer ýchaskeleri men dúnie-múlikteriniń tizimi jasaldy.
Shilde aiynda aimaqtaǵy 6 aýyl tabiǵi gazben qamtamasyz etiledi, kelesi jyly Baǵysta 300 oryndyq mektep salynady.
Prezidentke Jer komissiiasynyń jumys qorytyndylary jaiynda da esep berildi. Komissiia jumysynda 121 másele qarastyryldy.
Qazirgi tańda túzetýler engizilgen tiisti zań jobasy Parlament Májilisiniń qaraýynda jatyr.
Kezdesý sońynda Memleket basshysy bilim jáne ǵylym, densaýlyq saqtaý, mádeniet, áleýmettik qorǵaý máselelerine qatysty birqatar tapsyrma berdi.
