Eýraziialyq ekonomikalyq odaq aiasyndaǵy basty mindet - ekonomikalyq jáne saýda bailanystaryn saqtaý. Bul týraly «MIR» telearnasyna suhbat bergen QR Prezidenti Qasym-Jomart Toqaev aitty, dep habarlaidy QazAqparat.
«Qazaqstan - Táýelsiz memleketter dostastyǵy aiasyndaǵy postkeńestik keńistiktegi ekonomikalyq jáne basqa da bailanystardyń naqty jaqtasy. Barlyǵyna belgili bolyp otyrǵandai, ekonomika TMD memleketteri ekonomikalyq yntymaqtastyǵynyń lokomotivi sanalady. Dostastyqtaǵy saýda-ekonomikalyq bailanystardy keńeitý ásirese qazirgi jaǵdaida kún tártibindegi basym mindet bolyp otyr. Saýda salasyndaǵy bizdiń ózara is-qimyl tetikterimiz 2011 jyly qol qoiylǵan erkin saýda aimaǵy týraly shart aiasynda qamtamasyz etilgen. Kóp jaǵdaida osy qujattyń arqasynda bizdiń saýda-ekonomikalyq qarym-qatynasymyz jańa deńgeige kóterildi», - dedi Memleket basshysy.
Máselen, QR Prezidentiniń málimetinshe, Qazaqstan taýar ainalymynyń ortasha eseppen 25 paiyzy TMD boiynsha seriktesterine tiesili bolyp tur. Keibir memleketter úshin bul kórsetkish 60 paiyzǵa da jetip qalady. 2018 jyly TMD ishindegi taýar ainalymy 191 mlrd dollardan asyp jyǵylyp, 12 paiyzǵa jýyq ósim kórsetti. Oń tendentsiia ótken jyly da baiqaldy.
«Ókinishke qarai, búgingi kúni syrtqy sebepterdiń jáne qubylmalyq halyqaralyq normalardyń yqpalymen protektsionistik ritorika Dostastyq memleketteri úshin de normaǵa ainalyp keledi. Óz óndirýshilerin qorǵaý TMD aiasynda qol jetkizilgen ýaǵdalastyqtardan joǵary qoiylýda. Menińshe, bul tendentsiia postvirýstyq kezeńde kúsheie túsýi múmkin. Búginde indetten týyndaǵan jahandyq daǵdarys jaǵdaiynda jáne shikizattyq taýarlar baǵasynyń quldyraýy aiasynda Eýraziialyq ekonomikalyq odaq aiasyndaǵy basty mindet ekonomikalyq jáne saýda bailanystardy saqtaý bolyp otyr», -dedi Memleket basshysy.
Qazaqstan Prezidenti atalǵan odaq aiasynda kapitaldy ilgeriletý, qyzmetter, jumys kúshi, jáne saýda erkindigi bar ekenin basa aitty.
«Endigi ýaqytta saýda 4 erkindiktiń bastysyna ainalady. Ókinishke qarai, daǵdarys kezinde ishki naryqtarda jańa kedergiler paida bolady. Qazirgi kezeńde odan qashyp qutyla da almaityn siiaqtymyz. Biraq olardyń ýaqytsha ekeni jáne qarym-qatynastarymyzdyń normasyna ainalmaýy mańyzdy. Birlesken jobalardy qarjylandyrý úshin birikken jobamyz - Eýraziialyq damý bankiniń múmkindikterin tiimdi paidalanýymyz qajet. Ásirese, postdaǵdarys kezeńinde», - dedi Qasym-Jomart Toqaev.
