Foto: Akorda.kz
Prezident Aqmola oblysyna jumys sapary barysynda Stepnogorsk qalasyndaǵy 6-shy shaǵynaýdannyń aýlasyn aralady, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev úi mańyndaǵy aýmaqta jasalǵan jaǵdaimen tanysyp, jergilikti turǵyndarmen áńgimelesti. Qala aýlalarynda balalarǵa arnalǵan oiyn jáne sport alańdary salynyp, trenajerler ornatylǵan, trotýarlar jasalǵan, kólik turaǵy oryndarynyń sany kóbeitilip, joldar asfalttalǵan.
«Halyq qatysatyn biýdjet» jobasy aiasynda Stepnogorsk qalasynyń ákimdigi úshinshi jyl qatarynan abattandyrý jumystaryn júzege asyryp keledi. Iske asyrylatyn jobalardy turǵyndardyń ózderi daýys berý arqyly tańdaidy.
Qala turǵyndarymen áńgimelesý barysynda Prezident Stepnogorsk qalasynyń damýyna erekshe kóńil bóletinin atap ótti. Jergilikti JEO men jylý jelileriniń jaǵdaiy – Stepnogorsk turǵyndaryn alańdatatyn mańyzdy máselelerdiń biri.
«Osy kásiporyndaǵy jaǵdaimen tanysqannan keiin bul máselelerdi muqiiat saralaýǵa sheshim qabyldadym. Úkimetke ákimdikpen jáne kásiporyn ielerimen birlese otyryp, is-áreket algoritmin ázirleýge, sheshimder qabyldaýǵa tapsyrma berdim», – dedi Memleket basshysy.
«Men bul máseleden habardarmyn. Maǵan ýtilizatsiia boiynsha shaǵyn kásiporyn salý jóninde sheshim bar ekenin baiandady. Mundai sheshimdi qoldaimyn», – dedi Prezident.
«Bóstóbe» kenishine qatysty jaǵdai da nazardan tys qalmady. Bul másele Prezidenttiń baqylaýynda, jergilikti organdarǵa atalǵan problemany sheshý jóninde tiisti tapsyrma berildi.
Kezdesý sońynda Qasym-Jomart Toqaev qala turǵyndaryna zor densaýlyq, tabys, baq-bereke tiledi.
