Birqatar óńir jumys istep turǵan shaǵyn jáne orta biznes sanynyń qysqarýyna jol berip otyr. Bul týraly Úkimettiń keńeitilgen otyrysynda Memleket basshysy Qasym-Jomart Toqaev aitty, dep habarlaidy "Ult aqparat" Aqorda baspasóz qyzmetiniń Twitter-degi paraqshasyna silteme jasap.
«Shaǵyn jáne orta biznesti qoldaý úshin daǵdarysqa qarsy birqatar teńdessiz shara qabyldandy. Degenmen, óńirlerdiń basym bóliginde jumys istep turǵan ShOB sýbektileri sanynyń qysqarýyna jol berilgen», - dedi Memleket basshysy.
QR Prezidentiniń dereginshe, mundai olqylyq 8 óńirde oryn alǵan. Al Shyǵys Qazaqstan, Aqmola jáne Qostanai oblystarynda ShOB sany qatty qysqaryp ketken.
Aita keteiik, videobailanys arqyly ótip jatqan jiynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomikalyq damý qorytyndysy týraly esep berdi. Sondai-aq koronavirýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boiynsha bergen tapsyrmalary men mindetteri qarastyryldy.
Elimizdiń áleýmettik-ekonomikalyq damýynyń qorytyndylary men jyl sońyna deiin oryndaityn mindetter jóninde Premer-Ministr Asqar Mamin, aqsha-nesie saiasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epidemiologiialyq ahýaldy jaqsartý jónindegi sharalar týraly Densaýlyq saqtaý ministri Aleksei Tsoi baiandama jasady.
